Menu

800 ka mga estudyante ug out-of-school-youth ang misalmot sa SPES applicants’ orientation nga gipahitabo sa Freedon Gym, Panabo Parks and Plaza karong adlawa, Pebrero 4, 2023.

Bisan pa sa adlaw nga Sabado, wala nagmakuli ang buhatan sa Public Employment Services Office (PESO) sa Lokal nga Panggamhanan sa Panabo sa pagpangulo ni PESO Manager Cherelle Espinosa sa paghatag og impormasyon unsaon pag-apil sa programang Special Program for the Employment of Students o SPES.

Ang SPES usa ka youth employment bridging program sa Department of Labor and Employment nga nagalayon nga makahatag og temporaryo nga trabaho alang sa estudyanteng adunay problemang pinansyal, lakip na ang out-of school youth ug mga anak o dependent sa mga trabahanteng natanggal sa trabaho (displaced or would-be displaced workers). Kini giimplementa sa LGU-Panabo pinaagi sa Panabo PESO. Focal person niini mao si Darlaine Normandia.

Dili lang sweldo nga makatabang sa ilang pag-eskwela, daghang makat-onan, kasinatian ug koneksiyon ang makutlo sa mga SPES grantees sa ilang masudlan nga gobyerno o pribadong trabahoan.

Human sa applicants’ orientation, mopailawom ang mga partisipante sa eksaminasyon ug interbiyo isip pipila sa pamaagi sa pagpili sa mga grantee nga i-deploy karong Marso ug umaabot nga summer 2023.

🖋Erick Etis – Multimedia Unit / CIO Panabo
📸 Keir Jay Balingan – Labor & Employment Officer I / PESO Panabo
📸Emman Pan – Multimedia Unit / CIO Panabo

Categorized in News Release

Related Posts

LATEST