Menu

Gipasundayag sa Purok Ramihan Small Scale Farmers (PRSSFA) ang ilahang lain-laing gulay sa gipahitabong Harvest Festival alang sa Clustered-High Value Vegetables Production sa Purok Ramihan Barangay Datu Abdul, subay sa tema nga “Celebrate the fresh vegetable produce in time of Pandemic” adtong Septiyembre 1, 2021.

Pinaagi sa suporta ni City Mayor Jose E. Relampagos, malampuson ang inisyatibo sa City Agriculture’s Office (CAGRO), nga gipangunahan ni City Agriculturist Samuel N. Anay, nga matabangan ang mga mag-uuma sa panahon sa pandemya hilabi na sa mga banana farmers tungod naapektohan ilang Cavendish Banana sa sakit nga Fusarium Wilt. Adunay programa alang sa high-valued crops kung asa gigahinan og pagtagad ang mga small scale farmers aron mahatagan og libre nga mga similya sa mga gulay ug abono nga mamahimong magamit nila sa pagtanom.

Sa maong selebrasyon, giimbitahan ang small scale farmers diin upat ka mga clusters ang mga nagbaligya sa ilang naani nga mga produkto. Ang harvest festival dakong tabang hilabi na sa mga PRSSFA kay mapasigarbo nila ang ilang mga gulay ug prutas.

Sumala pa ni Anay, ang pokus sa lokal nga panggamhanan kay matabangan ang mga farmers hilabi na ang naa sa Purok Ramihan kay banana area kini. Pero tungod sa sakit nga ningtama niini, kinahanglan na mapangitaan og pamaagi nga matabangan ang mga mag-uuma aron mahimo gihapong produktibo ang yuta.

Dugang pa niya, “Gipaningkamotan sa CAGRO ug ni City Mayor Relampagos nga naay matukod nga marketing hub diin direkta na sa mga mag-uuma ang halin ug benepisyo sa ilang mga baligya.”

Mapasalamaton usab si PRSSFA President Alex Macla Jr. sa lokal nga panggamhanan hilabi sa CAGRO ug kay City Mayor Relampagos kay gitabangan sila maskin wala silay kapital. Ingon pa niya, “Gihatagan mi og similya, gipa seminar, ug gihatagan og uban pang mga panginahanglanon para sa pagtanom maong makapasalig mi nga makaprovide mi og fresh veggies kay dako ang area sa Purok Ramihan nga puwedeng tamnan.”

Gilaoman nga magpadayon ang pagproduce sa mga lokal nga mga mag-uuma sa ilang mga produkto para matabangan ang kakulangan sa pagkaon hilabi na sa Panabo.

Duyog sa maong selebrasyon sila City Mayor Jose E. Relampagos, Barangay Captain sa Datu Abdul Hon. Allan Pangay, Sr. Agriculturist Reynaldo Agorde, Panabo Clustered-High Value Federation President Oscar Amante, Banwag Coordinator Allan Sarabia, ug Agriculturist I – HVC Coordinator Honeybee S. Roma.

| Tim Acebedo, CIO-PIRO
📸 | Rommel Cayas

Categorized in Featured , News Release

Related Posts

LATEST