Menu

Sa dugay nga panahon nga pagpaabot, nakabalik na gayud ang pipila ka mga tulunghaan sama sa UCCP-Panabo Christian Academy, Inc. (UCCP-PCAI) ang nagsugod sa ilang limited face-to-face classes. Gawas sa UCCP-PCAI, nag-abri ang duha (2) ka pampublikong tulonghaan: ang Sto. Niño Elementary School ug Manay National High School adtong Abril 25, 2022.

Sumala pa ni UCCP-PCAI School Head Betty L. Harceda nga garbo sa ilang eskwelahan nga sila ang unang pribadong tulonghaan nga nag-abri alang sa F2F class. Ani pa niya, “Lahi ragyod nga ang mga bata magtuon sulod sa eskwelahan maong naningkamot mi nga mabalik ang F2F class ug karon anaa na.” Sa ilang pag-abri, gisalmotan kini og dul-an 50 ka mga bata gikan Kindergarten hangtod Grade 6.

Giingganyo usab ni Harceda ang ubang pribadong eskwelahan nga mag-abli na aron mas daghan na ang mga estudyante ang makakat-on kauban ang mga magtutudlo sa personal.

Sa laing bahin, sa unang adlaw sa pagbalik sa limitadong F2F class sa Sto. Niño Elementary School, giubanan sila sa usa ka sikat nga mascot nga si ‘Micky Mouse’ aron nga makigduyog sa opening program. Nalingaw usab ang 109 ka mga estudyante nga gikan Kindergarten hangtod Grade 3 nga misayaw sa ilang morning exercise.

Dugang niini, nalipay si School Head Arnel Duropan nga nakapahigayon nagyod sila og F2F class, dili man tanang Grade level ang mibalik na apan dako gihapon siya og pasalamatan nga anaa nay mga bata usab sa eskwelahan nila.

Sa kaparehas nga adlaw, mi-abli ang Manay National High School alang sa limited F2F class. Gilangkuban kini sa 29 ka mga Grade 7 students ug 10 ka mga Grade 12 Senior High School-Home Economics Strand. Sa ilang, opening program adunay gipanghatag nga libreng health kits para sa tanan.

Ani pa ni Manay NHS School Head Edarlina Bitang, nga giprayoridad nila ang Grade 7 kay importante ilang ‘transition’ gikan Grade 6, ang Grade 12 Home Economics Strand usab kay graduating ug kinahanglan hands on ilang pagtuon.

Gipahimangnoan kanunay sa mga magtutudlo ang mga estudyante nga magsunod sa ‘safety protocols’ sama sa dili pagtanggal sa face mask, social distancing ug maghugas og kamot. Gisiguro usab sa matag eskwelahan nga andam ang contingency plan nila kung anaay gidudahang kaso sa COVID-19.

✍️ Tim Acebedo, CIO-PIRO

Categorized in Featured , News Release

Related Posts

LATEST