Mikunhod ang kaso sa tuberculosis (TB) sa siyudad sumala pa sa CHO Panabo subay sa tulo ka tuig nga milabay.

Sa interview kai CHO National Tuberculosis Program Coordinator Mary Divine Grace T. Hofileña, adunay 290 nga kaso sa TB sa tuig 2019 ang natala sa CHO Panabo ug ubos kini kompara sa tuig 2018 ug 2017. Katorse (14) anyos ang pinakabata nga kaso sa TB sa siyudad.

“Lalaki kasagaran cases sa TB” ingon pa ni Ms. Hofileña.

Ang Tuberculosis usa ka sakit nga makatakod gikan sa kagaw nga Mycobacterium TB nga usa ka kagaw nga dala sa hangin nga kasagarang moapekto sa baga sa tao. Mahimo kining makamatay kung dili masanta sa sakto na panahon.

Makatakod ang TB pinaagi sa pag-ubo, paghatsing ug pangluwa sa usa ka tawo nga adunay Tuberculosis (TB). Magpabilin ang kagaw sa hangin kung dili sakto ang bentilasyon o sobra ka guot ang usa ka lugar.

Timailhan sa taong adunay TB o Tuberculosis; ubo nga mokabat sa duha ka semana, pag-ubo ug pagluwa nga adunay plema nga sagol dugo, pagpanakit sa likod ug dughan nga dili tungod sa ubang sakit.

Matambalan ang TB pinaagi sa Directly Observed Treatment Short Course (DOTS) o tutok gamutan nga mao ang pinakaepektibong pagtambal niini. Dali lang matambalan ang TB kung moinom og sakto nga tambal sulod sa unom (6) ka bulan para sa Drug-Susceptible Tuberculosis (DSTB) ug siyam (9) ka bulan para sa Multi-Drug-Resistant Tuberculosis (MDRTB).

Gipahinumdoman sa CHO Panabo nga dili magpataka og pangluwa sa palibot, magpraktis sa maayong personal nga kahinlo ug paghugas kanunay sa kamot subay sa panghimangno sa Department of Health (DOH).

Abli matag lunes hangtod biyernes ang CHO Panabo alang sa mga walk in clients nga magpakonsulta sa sakit nga TB, bisitaha ang CHO Panabo alang sa dugang impormasyon nga nahimotang karon sa Barangay New Pandan, Panabo City.

(R.Dulla/CIO-Public Information & Research Ops)

Categorized in Featured News

Related Posts

LATEST