Gideklarang kampyon sa 2nd Mayor Jose Relampagos Badminton Doubles Tournament niadtong Marso 28, 2021 ang mag-igsoong Adrian Jhunne Perez ug Michael Jastine Perez sa Men’s Doubles samtang nasungkit ang kadaugan sa Women’s Doubles nila Vanessa Joy Sullan ug Abegail Joy Eugenio. Siyam (9) ka pares sa men’s category ug unom (6) ka team sa women’s category ang nagsangka sa teknik, abilidad ug lahutay sa binunalay og shuttlecock didto sa JB Smashville and Recreation Center, Ascend Building sa Quezon St., Barangay New Pandan.

“Gilantaw ni Mayor Joe Relampagos nga taliwala sa pandemya makapahigayon kita og kompetisyon alang sa mga badminton players nga taga-Panabo ug matagaan og kalingawan ang mga sports enthusiasts atol sa 20th Araw ng Panabo,” matod ni City Sports Coordinator Gerald V. Capuyan. Dugang niya nga ang ilang gisigurado nga nasunod ang DOH protocol kontra COVID-19 aron masiguro nga luwas ang padula ug nalingaw ang tanan.

Matod pa ni Sullan, 19, nga “Lingaw ang padula ug maabiabihon ang mga organizer.” Dugang ni Adrian Jhunne Perez, 26, naganahan siya sa padula kay libre ang registration fee ug dako ang papremyo hinungdan nga nadasig sila nga magpraktis.

Aminado ang mag-igsoong Perez sa kamahinungdanon sa mga kalihokan sa sports atol sa pandemya aron pagmintinar sa maayong pisikal ug mental nga kahimsog sa panlawas, ingon man aron padayong mahasa ang katakos sa napiling dula.

🖋️ Erick Etis – CIO Multimedia
📸 Rommel Cayas

Categorized in Featured News , News Release

Related Posts

LATEST