Menu

Migahin og pundo si City Mayor Jose E.Relampagos alang sa pagpalit og bakuna batok COVID-19 pinaagi sa usa ka resolusyon gikan sa City Disaster Risk Reduction Management Council. Ang inisyatibo gimugna isip tubag sa limitadong supply sa bakuna nga gigahin sa Department of Health sa mga LGU.

Ang pundo nga mokantidad og P30,788,530.79 ilawom sa DRRM nga badyet gilaoman nga makapalit og 25,000 ka bakuna ug usa (1) ka refrigerator storage samtang 3,000 ang mapalit gikan sa Special Trust Fund nga mokantidad og P4,100,000.00.

Bago maggasto ang pundo, kinahanglan kini og pagtugot gikan sa Sangguniang Panlungsod sukad nga ilang gi-apil ang plano sa Annual Investment Program adtong Hulyo 19,2021.

Matod pa ni Mayor Relampagos, pagmatugotan na sa Sangguniang Panlungsod ang gigahin nga pundo, ang paliton nga bakuna kay ang “Janssen” nga brand gikan sa Johnson & Johnson tungod nga kausa lang ang dose niini. Protokol usab sa pagpalit og bakuna ang pakig-alayon pa sa DOH.

Padayon gihapon ang pag-awhag sa Panabo City Health Office sa katawhan nga magparehistro sa ilang Barangay Health Centers aron ma skedyulan sila sa vaccination sites. Sa 125,538 ka indibidwal nga target mabakunahan sa Panabo City, anaa pa sa mga 20% ang nabakunahan.

Sa “New Normal”, gipahimangno ang katawhan nga magsunod sa minimum public health protocol ug mahimong magbinantayon sa panahon sa pandemiya.

| cio

Categorized in Featured , News Release

Related Posts

LATEST