Menu

Sa pagkakaron, wala nagdeklara og “Dengue Outbreak” ang City Health Office sa Panabo human sa ilang panagpulong kauban ang Department of Health (DOH) ug CDRRMO adtong Hulyo 26, 2022. Bisan pa nga dili pa kini “Outbreak”, usa gihapon kini ka prayoridad nga sulbaron sa CHO.

Sa bagong datos, adunay sumatotal nga 294 ka suspected cases ang nalista sa CHO sugod Enero karong tuiga. Sumala pa ni Acting City Health Officer Dr. Eranie L. Pangilinan nga prayoridad nila nga mapakgang ang Dengue pinaagi sa paghatag og mga solusyon sama sa pagpalit og misting machines alang sa Fogging ug pakigpulong sa mga barangay kapitan alang sa pagpa-aktibo sa “Oplan Kulob” ug clean-up drive sa kada barangay.

Gawas sa pakig-alayon sa CDRRMO ug barangay, gikinahanglan usab ang pagpakalat sa impormasyon kabahin sa Dengue ug unsaon kini malikayan.

“Wala man treatment ang dengue. Pwede man gud na siya malikayan bsta maglimpyo ra gyud,” dugang ni Pangilinan. “Check 4 o’clock habit. More on environmental sanitation ang prevention ani.” Usa usab sa na ilang hinungdan sa pagtaas sa kaso mao ang panahon sa ting-ulan.


Ang sintomas sa Dengue kay ang pagsakit sa ulo, lawas, rashes, kalibanga, pagsuka, ug kalintura. Kung aduna kamoy gibati sama niini, ayaw pagduha-duha og pakonsulta sa doktor o sa City Health Office-Out Patient Department.

| CIO
📸 Panabo City Disaster Risk Reduction and Management Office

Categorized in Featured , News Release

Related Posts

LATEST