Hunyo 25, 2026 – Opisyal nga giturn-over ang bag-ong 1-storey, 2-classroom school building sa Nanyo Central Elementary School, nga gilauman makatabang sa paghatag og mas maayong palugar sa pagkat-on alang sa mga estudyanteng kindergarten.

Isip representante ni City Mayor Jose E. Relampagos, mitambong si Executive Secretary Jo-anne Gentiles Relampagos ug nagpadayag nga ang proyekto usa ka dugang suporta sa sektor sa edukasyon ug makahatag og mas komportable nga pasilidad alang sa mga magtutudlo ug mga kabataan.

Mitambong usab sa kalihokan ang mga opisyal sa Barangay Nanyo sa pagdumala ni Barangay Captain Arturo I. Davis, DepEd Panabo sa pagpanguna ni Curriculum Implementation Division Chief Janwario E. Yamota, uban sa mga magtutudlo ug kawani sa Nanyo Central Elementary School nga gipangulohan ni Principal III Leonora D. Cañete.

Lakip sa programa ang blessing, ribbon-cutting ceremony, ug ceremonial turn-over sa bag-ong building isip simbolo sa padayong paningkamot sa paghatag og kalidad nga edukasyon alang sa mga kabataan sa Panabo.