Sugod Setyembre 10, 2020, 30 ka mananagat ug tag-iya og bangka sa pagpanagat ang nagparehistro atol sa gipahitabo nga registration sa Gugmasan, Barangay San Vicente. Tumong niini ang pagpa-legal sa ilang pagpanagat ug matagaan sila og pagtagad ug proteksyon sa Lokal nga Panggamhanan.

Gibutyag ni Fishery Licensing Staff Lanie A. Gerodias nga mandato ang registration subay sa City Ordinance 03-03. Ingon niya, “Need nila nga magparehistro aron safety ug mahimong Legal ang ilang pagpanagat, kini usab naglangkob sa Philippine Fisheries Law RA 10654, kanhing RA 8550 ug gipahingusgan pinaagi sa City Ordinance 03-03, aron maregulate ang mga aktibidades sa atuang kadagatan. Kini usab makatabang aron makuha ang profile sa mga boat owner ug fisherfolks.”

Si Bernabe Flores, usa sa nagparehistro nga lumulupyo sa Barangay San Vicente, miingon, “Ika-duhang tuig ko na ni sa pagparehistro. Lisod managat kung dili tarong ang atong pagpanagat busa kinahanglan gyud nga magparehistro aron mahimong legal ang akong pagpanagat.”

Sa pagparehistro magdala lang og Barangay Clearance, Cedula, FARM Certification, 2X2 ID Picture (2pcs), PNP Maritime Clearance, Admeasurements, Fishery license ID, ug Old Boat Permit alang sa pag renewal.

Magpahamtang usab og registration sa Setyembre 11,2020 sa Barangay San Pedro, Setyember 14,2020 sa Barangay JP Laurel , ug Setyembre 15,2020 sa Barangay Cagangohan.

Atol sa registration, anaa ang Fishery Section sa City Agriculture’s Office, PNP-Maritime, Coast Guard, ug mga kawani sa barangay.

| Mel Hilario CIO-PIRO