Agosto 18,2020 — Gipahigayon ang orientation sa DavNor Kaagapay Program nga inisyatibo ni Governor Edwin I. Jubahib isip programa alang sa “Food Sufficiency” sa katawhan luyo sa pagsagubang sa pandemiya sa COVID-19.

Ang giyahan lamang sa paghatag og similya ug mga alagang hayop mao ang mga backyard gardiner nga adunay 3×4 nga luna ug mga backyard raisers.

Ang DavNor Kaagapay usa ka bayanihan diin ang matag pamilya, grupo, o kumyonidad hatagan og mga similya sa tanom sama sa gulay, saging, palkata, mahugani, sugom, ug uban pa. Anaa usab ang mga hayop nga pwede alimahan o pasanayon.

Tumong niini nga ang katawhan adunay maluntarong supply sa pagkaon, dugang kita sa pamilya, ug matabangan usab nga mabalik ang katahom sa kinaiyahan.

Ang probinsyal nga paggamhanan usab ang bahala sa pagpangita ug mopalit sa mga naugmad o na harvest sa katawhan. Mga inalimahan ug gisanay nga mga hayop. Ang mga katawhan giyahan sa mga Barangay Extension Workers (BSW’s) nga gibansad sa paghatag og kaalam sa paggamit sa teknolohiya, pagahatag ug assistance, similya, pagmonitor, ug pagharvest.

Aron malampuson ang pag-uma, aduna usab cellphone application nga motabang sa pagpadali sa transaction sa pagsalmot sa DavNor kaagapay sa pagpangita, pagpalit ug pakig-alayon sa probisyal nga paggamhanan.

Matod pa sa representante ni Governor Jubahib nga si Executive Assistant II Wowee De Ramos, “Naa tay DavNor kaagapay para mag-encourage sa atong katawhan sa matagbarangay og pagtanom ug aduna’y mapahinuhaan ug pagkaon sa ilang lataran.”

Dungag pa niya nga adunay tulo ka rason nganong adunay DavNor Kaagapay, “una, mahimong food basket ang Davao Del Norte, ikaduha ang aduna kita’y pagkaon sa atong lamesa, ug ikatulo adunay income ang pamilya.”

Gibutyag usab ni City Mayor Jose E. Relampagos nga dapat ang mga katawhan makig-alawit sa barangay aron magkahiusa ug magmalampuson ang programa alang sa katawhan.

Ang maong programa gisalmutan sad ni Board Member Janet Tanong-Maboloc, Board Member Janris Relampagos, City Administrator Pedrito Misoles, Head of the Technical Working Group of Davnor Kaagapay ug Department Head sa Provincial Environment and Natural Resources Dr. Romulo Tagalo, mga Provincial Department Heads, City Councilors, ang 40 ka Barangay Captain, ug mga Barangay Extention Worker BEW’s.

| Mel Hilario, CIO-PIRO