Septyembre 6, 2022 — Sa wala pa misidlak ang adlaw, gipahitabo na ang pagdistribute sa 120 ka mga baboy sa 74 ka hog raisers sa siyudad sa Panabo nga naapektohan sa African Swine Fever (ASF) sa mga barangay Cagangohan, New Malitbog, Sta. Cruz, Quezon, ug San Vicente. Gipahitabo ang pagpanghatag niini sa Panabo City Gym Ground.

Ang maong pagpanghatag og baboy usa ka programa gikan sa Department of Agriculture (DA) nga Swine Recovery and Repopulation Hog Sentineling Program aron mahatagan og kahigayonan ang mga hog raisers nga makabuhi na usab og baboy sulod sa 40 ka adlaw.

Pinaagi sa City Mayor’s Office – City Veterinary Section i monitor ang ilang pagbuhi nga wala nay balakid sa usa man nga sakit na mudapo sa mga baboy. Gisiguro usab sa Lokal nga Panggamhanan nga sa pagbuhi sa mga baboy gikinahanglan ang pag disinfect ug pagmintinar sa kahinlo sa mga kulongan niini.

Matod pa ni Bertoldo Pulido, 64 anyos, taga Barangay Cagangohan nga benepisyaryo sa maong program nga dako kining tabang sa ilaha ilabi na nga usa kini sa ilang panginabuhian. “Ako usab pasalamat kay Mayor Relampagos sa kanunay nga paghatag og supporta kanamo nga mga hog raisers”, dugang pa ni Pulido.

Mahinumduman nga adtong tuig 2020 mikuyanap ang ASF sa Davao Region diin unang naapektohan ang Panabo City. Sa maong higayon, ang Lokal nga Panggamhanan sa administrasyon ni City Mayor Jose E. Relampagos mipaabot sa supporta kanila sa pagpanghatag og cash assistance sa mga hog raisers. Samtang adtong Agosto 4 ning tuiga, gihatag na sa mga hog raisers ang mga mga feeds nga gilangkuban og upat (4) ka sako sa matag usa (1) ka baboy.

Anaa sa maong kalihokan, sila Executive Secretary Josie Mary E. Relampagos, City Administrator Pedrito A. Misoles, City Councilor Hon. Sherlou Bangoy, ug Shenna Tatoy nga representante sa DA Region XI.

|IDOB