Subay sa pagsaulog sa 73rd Araw ng Barangay New Visayas, nagpahigayon og Hybrid Trabaho, Negosyo, Kabuhayan 2022 ang Davao del Norte State College (DNSC) Job Placement Office sa pakig-alayon sa PESO Panabo adtong Hulyo 13, 2022 ngadto sa ABC Hall, Barangay New Pandan, Panabo City.

Tumong niini nga mahatagan og oportunidad ang katawhan nga mapalambo ilahang pamuyo pinaagi sa trabaho o panginabuhian. Ang TNK adunay mga aktibidades nga gitanyag: (1) Virtual job fair, (2) Entrepreneurial mind setting seminar, ug (3) Livelihood training sa Perfume making ug Liquid hand soap making.

Gisugdan ang kalihokan sa virtual job fair diin adunay 123 ka mga aplikante ang nisulay og pagpanarbaho sa napulo (10) ka mga partnered agencies. Sa maong higayon, 96 niini ang na-interview ug 27 ang ‘for further interview’ ug kapin 38 usab ka mga partisipante ang misalmot sa maong livelihood training ug seminar.

Mihatag og mensahe si City Administrator Pedrito Misoles isip representante ni City Mayor Jose E. Relampagos pinaagi sa virtual zoom. Gipaabot niya ang pagpasalamat sa mga opisina nga maoy nagdumala sa programa nga mapadali ang pag-abot sa mga serbisyo ngadto sa katawhan. “I express my full support sa ingon-ani nga kalihokan. Tungod ani, people have more access to employment,” ingon pa ni Misoles.

Nakigduyog usab sa programa ang mga personahe sa Department of Trade and Industry-Negosyo Center, Barangay New Visayas officials and functionaries, ug DOLE Davao del Norte.

Alang sa gusto motan-aw sa kinatibuk-ang live viewing sa virtual facebook, bisitaha ang maong link: https://fb.watch/ee9UCmMNX4/

lcio
Photos: A. Castilla/PESO