Gimandoan karon sa Department of the Interior and Local Government (DILG) ang mga barangay LGU nga i-display sa publiko ang mga telephone o cellphone numbers sa ilang mga barangay, lakip na ang contact number sa punong barangay o kapitan ug ang mga miyembro sa Barangay Health Emergency Response Teams (BHERTs). Subay kini sa gipagawas nga DILG Memorandum Circular No. 2022-046 adtong Abril 18, 2022.

Base pa sa DILG memorandum circular nga bisan man nga nagpagawas na sila og mga mandato, aduna gihapon mga nanggawas nga mga reklamo, isyu, ug kabalaka gikan sa publiko tungod sa walay pagpahibalo sa mga contact numbers sa mga barangay labi na sa panahon sa sakuna. Wala usab nasayod ang publiko sa hinungdan sa BHERTs sa komunidad.

Tungod niini, usa sa mga direktibo karon sa DILG sa mga barangay LGU kay ang pagmugna og ilahang kaugalingon nga Official Facebook (FB) Account o social media account nga adunay postings kabahin sa BHERT, lakip na ang pangalan ug contact details sa miyembro niini. Apil usab sa posting ang BHERT activities ug uban pa nga importanteng impormasyon.

Ikaduha, ang pag-display og mga poster o tarpaulin nga adunay: (1) Active telephone number sa barangay apil ang e-mail address ug social media account niini; (2) pangalan a punong barangay ug iyang active cellphone o landline numbers; ug (3) pangalan, designation, ug active cellphone o landline number sa mga miyembro sa BHERTs. Kinahanglan usab magsumiter og monitoring report ngadto sa DILG pagka Mayo 15, 2022 subay sa ilahang gihatag nga format nga naa sa memorandum circular.

Mahinumdoman nga nag-una na kini nga lakang sa Lokal nga Panggamhanan sa Panabo City pinaagi sa Local Media Board nga gipangulohan ni City Mayor Jose E. Relampagos nga naghangyo sa kada barangay LGU nga magmugna og ilahang kaugalingon nga social media accounts alang sa mas-informed na komunidad.

|CIO Panabo