Oktubre 19, 2021 – Gipasigarbo sa Tribung Ati sa Barangay Kasilak ug Tribung Kagan sa Barangay Little Panay ang ilahang kahawod sa pagluto, ang ilahang tradisyonal nga sayaw, ug ang ilahang kasuotan sulod sa pagsaulog sa selebrasyon sa 10th Buwan ng Tribu nga adunay temang: “Kasadya sa Tribu, Taliwala sa Pandemya”.

Nihatag og mensahe ang representante sa National Commission of Indigenous Peoples (NCIP) nga si Michelle Aquino nga mapasalamaton sila sa tanang tawo nga nagkugi sa pagprepara sa maong selebrasyon ug kontes. Dugang niya, “Bisan pa luyo kita sa pandemya, padayon kita nga mobarog mga IPs, irespeto nato kanunay atong katungod ug dili nato kini ikaulaw.”

Ani ni Emily Tabal, usa ka partisipante sa Lutong Tribu sa Ati Tribe nga nalipay siya kay bisan pa nga lisod ang panahon karon tungod sa pandemya, gihatagan gihapon og higayon ang mga IPs nga magselebrar sa Buwang ng Tribu. Dugang pa niya, “Tungod ani nga kalihokan, napasigarbo namo ang among lutong tribu ug kini usa ka dakong kalipay namo nga ipausbaw among tribu.”

Anaa sila Reynard Engada, Michelle Aquino, ug Arnel Mangkias isip mga judges sa maong kontes. Mitambong usab si City Tribal Chieftain Bae Merlinda B. Aranar aron ipakita ang suporta sa iyahang mga miyembro nga IPs.

Ang mga tribu ug Barangay nga magpasundayag sunod sa ilahang Tribal Attire, Lutong Tribu, ug Sayaw sa Tribu kay ang mosunod:
Oktubre 20, 2021 para sa Bagobo, ug Sama Tribe nga pagahitaboon sa Barangay Maduao, ug Upper Licanan

Oktubre 21, 2021 para sa Mandaya, ug Ata Manobo Tribe nga pagahitaboon sa Sindaton, ug Lower Panaga

Oktubre 22, 2021 para sa Manobo, ug Tagakaulo Tribe nga pagahitaboon sa Barangay San Vicente, ug Salvacion.

Gigrupo ang mga barangay alang sa mga aktibidadis nga pagahitaboon sa 10th Buwan ng Tribu, kini aron makalikay sa hulga sa COVID-19.

| Tim Acebedo, CIO-PIRO
📸| Quinn Villahermosa, CIO-MULTIMEDIA