Pinaagi sa DILG Memorandum Circular 2021-143, tanang electoral candidates o ilang organisers gimandoan nga mokuha og Written Permit sa City Government lima (5) ka adlaw bago ang aktwal nga pagpahigayon og Pre-Election Campaign Activity o Public Assembly. Pirmado mismo kini ni DILG Secretary Eduardo M. Año adtong Disyembre 22, 2021.

Tumong sa DILG nga mahan-ay ang pagpahigayon sa mga public assemblies subay sa Batas Pambansa 880 o The Public Assembly Act of 1985 nga nagmando sa mayor nga maghatag og permit sa gusto magpahigayon og public assembly, gawas lang kung posible kining maka-apekto sa public order, public safety, public convenience, public morals, o public health.

Bago hatagan ang kandidato o organiser og permit, kinahanglan maghatag pa ang lokal nga PNP og sulat sa iyang assessment o rekomendasyon nga pwede kining mahigayon. Pwede usab magkonsulta ang Mayor sa Health Officer ug sa Traffic Management.

Naghatag usab og gahum ang MC sa LGU nga magdugang og mga requirements sa permit aron masiguro ang kaayohan sa katibok-an sama sa: (1) Certification gikan sa kandidato o organiser nga adunay silay tulubagon kung adunay paglapas sa health protocols; (2) contact tracing requirement mechanism ug; (3) paglimit sa magpartisipar sa mga “vaccinated individuals.”

Dugang pahinumdom sa pagpahigayon og assembly kay ang pagsunod sa polisiya sa Alert Level System, pagsuot og face mask, pag-obserba sa minimum public health standards, ug ang pagsubay sa dalan nga gitugotan sa LGU alang sa mga motorcades o caravans.

Ang LGU pwede magpatabang sa Punong Barangay ug PNP o ilang personahe nga masiguro ang pagsunod sa minimum public health standards ug peace and order sa lugar kung asa gipahigayon ang public assembly.

Sa Section 4.2.4 miingon nga pwede dili mahatagan og permit ang kandidato o iyang organiser sa ikaduhang higayon kung adunay pagsupak sa guidelines.

Ang Memorandum Circular 2021-143 epektibo lamang sa mga adlaw bago ang opisyal nga Campaign Period na gihatag sa COMELEC.

Gipanagtag na usab ang kopya sa MC ngadto sa mga kandidato adtong Enero 18, 2022 pinaagi sa City Mayor’s Office.

| CIO Panabo