Nagpahigayon og pagpanghatag og cash assistance alang sa apektado nga mga Hog Raisers sa Barangay Sta. Cruz ug Quezon mahitungod sa African Swine Fever (ASF). Nanguna sa kalihokan si Panabo City Veterinarian Dr. John Ray A. Bautista subay sa Distribution of Cash Assistance under ASF Indemnification Program adtong Agosto 19, 2021 sa New City Hall sa Panabo.

Ang tumong sa kalihokan kay mahatagan og kapital ang mga apektadong hog raisers para sa laing negosyo nga gusto nilang sugdan. Matod pa ni Dr. Bautista nga lisod pa magsugod balik sa pagpamuhi og baboy maong dakong tabang ang cash assistance nga ilang nadawat. Dugang niya, “Sa karon wala pa gihapon na clear ang ASF sa Panabo maong gamiton usa nila ang ayuda nga ilang nadawat sa laing negosyo o investment para naa silay dungag sa pang adlaw-adlaw.”

Ang target nga mahatagan og cash assitance sa gikan sa duha ka barangay kay 45 ka mga apektado nga hog raisers diin sila ang ika-upat nga batch nga nahatagan. Naggikan sa Department of Agriculture (DA) ang ayuda nga Php 5,000.00 matag baboy ug ninghatag usab og Php 1,500.00 ang Provincial Veterinarian Office kada baboy nga naapektohan.

Ang ASF kay makatakod ug makamatay nga sakit sa mga baboy sa tanang pangedaron nga dala sa virus. Ang virus hilabihan kaisog ug mahimong magpabiling buhi sa pila ka buwan sa patayng lawas sa baboy, dugo, tai, tissues ug frozen o processed meats. Motakod kini pinaagi sa direct contact, pinakaon ug lamaw, sakyanan, sanina og gamit nga kontaminado sa ASF virus ug pinaagi sa mechanical transmission (sama sa dagom sa panahon sa pagpatambal). Walay bakuna nga magamit batok sa ASF apan dili kini makatakod ngadto sa tawo.
Ang Barangay Cagangohan ug JP Laurel ang sunod nga grupo nga mahatagan.

| Tim Acebedo, CIO-PIRO
📸 | F. Paculanang