Mibalik na sa unang adlaw sa limited face to face classes ang Doña Nenita R. Floirendo Elementary School, ug Cabili Elementary School adtong Mayo 18, 2022 kauban ang uban pang tulonghaan nga San Francisco Elementary School, Salvacion Elementary School, AO Floirendo Elementary School, ug Licanan Elementary School.

Kapin 200 ka mga Kinder hangtod Grade III na mga estudyante ang misalmot sa Doña Nenita RES sul-ob ang ilahang Pista sa Nayon nga mga sinina. Adunay giprepara nga mga pahalipay usab ang mga magtutudlo sama sa sayaw ug pa-burger sa mga bata. Wala usab nagpaulahi ang tulonghaan nga Cabili ES sa pagsugat sa 431 ka mga estudyante gikan Kinder hangtod Grade 6 sa ilahang unang adlaw sa klase pinaagi sa paghatag og kalingaw nga pa-mascot ug festive nga tema.

“Ang goal nato sa mga kabataan mao ang i-edukar sila. Gibati namo mga teachers na ma-meet ang ilahang mga needs maong nangusog mi nga makaabri balik sa klase,” ingon ni school principal Elsie M. Carballo. Tungod pa usab sa mga pagpaningkamot ug kakugi, nahitabo sa Cabili ES na magbalik sa klase ang Kinder hangtod Grade 6. “I am very thankful for this opportunity. Akong gitimbaya ang akong mga kauban na teachers ug parents luyo ani nga katumanan kay nahitabo na gyud ang among ginahulat,” ani pa ni school principal Marjorie Baldestamon.

Hingpit na suporta ang gihatag sa Lokal nga Panggamhanan alang sa mga tulonghaan gikan sa pagprepara hangtod sa pag-implementa sa limitadong klase. Dili ikalimod ang nakita nga kalipay ug kahinam sa mga magtutudlo ug estudyante human sa duha (2) ka tuig nga pagtuon sa online o modular.

Nakigduyog pa usab sa kalihokan ang mga personahe sa DepEd Panabo City Division, PTA officers, ug mga barangay functionaries sa maong kalingawan.

l M. Lagura
Photos: R. Cayas