Hunyo 01,2021 — Kalipay ang nasinati ni Lola Apolonia R.Devibar isip 2021 Centenarian Awardee labi na nga nakadawat siya og P100,000.00 incentive nga gihatag mismo sa Department of Social Welfare and Development (DSWD) XI. Gawas sa DSWD cash incentive, nakadawat si Lola Apolonia og P30,000.00 gikan sa City Government of Panabo isip counterpart alang sa mga centenarian awardee. Mahinumdumang gigawaran si Lola Apolonia Devibar og Centenarian Awardee sa iyang ika-100 na birthday adtong Pebrero 18, 2021.

Mapasalamaton usab ang mga anak ni Lola Apolonia sa nadawat sa ilang pinalanggang inahan. “Ang kwarta nga nadawat ni mama amo gihapong gamiton para sa iyang maintenance na tambal ug iyang vitamins,” saysay pa ni Norma Devibar-Calonsag. “Ug tungod tiguwang na si mama, isda ug gulay ra gyud ang among ginaluto para niya.”

Sa pagturn-over sa cash assistance, anaa sila DSWD Social Pension Unit Head Lywelyn T.Bibera, Executive Secretary ni Mayor Jose E. Relampagos nga si Josie Mary G. Relampagos, City Councilor Hon. Flopone Royle Catalan nga author sa Centenarian Ordinance sa Panabo, OSCA focal person Shiela Caval, ug mga DWSD XI representatives.

Ang Centenarian Award subay sa Republic Act 10868 o Centenarian Act of 2016 nga nagagarantiya sa mga senior citizens nga niabot og pangidaran nga 100 anyos makadawat og cash incentive.

Alang sa uban pang impormasyon, mamahimong mobisita sa OSCA nga nahimotang sa Barangay New Pandan, Panabo City.

| Sonny L. Calizar, CIO – PIRO
📷 | Aljun Castilla