Wala nagkulang ang Panabo City Health Office sa pagpasiguro sa mga katawhan nga luwas magpabakuna kontra COVID-19, labin na sa mga vulnerable sectors nga senior citizen ug mga batang nag edad og 5-11 anyos.

Bago gipagawas sa gobyerno ang mga bakuna, gisusi usa kini sa mga experto sa nasud ug gitugotan sa Food and Drug Administration nga mahatagan og emergency use of authorization aron magamit ang bakuna sa publiko.

Subay sa mandato sa Department of Health (DOH) kinahanglan mabakunahan ang 90% sa total population sa mga senior citizen ug 70% sa total population sa mga nag edad og 5-11 anyos.

Base sa datos sa CHO anaa pa sa 64.18% o 9,466 ka mga senior citizen ang nabakunahan base sa target nga 13,273 (90% of target) ug 30.24% o 5,864 base sa target nga 13,575 (70% of target) sa mga batang nag edad og 5-11 anyos.

Sulti pa ni National Immunization Program Coordinator Mafel R. Nugas, RN, nga walay angay ika-guol tungod ang bakuna safety kini sa katawhan. “Kung delikado ang bakuna, unang-una maapektohan kami mga health workers kay kami man una ning dawat sa bakuna.” Dugang pa ni Nugas na sutaon una ang mga giingon sa uban labaw na kung kini walay kamatuoran.

Alang sa gusto magpabakuna gikan sa primary dose ug booster shot abri ang BHW Building matag lunes ug Teen Center matag martes hangtod huwebes nga puros nahimutang sa Panabo City Health Office.

| M. Gentiles
SMC: E. Pan