Enero 20, 2022 – Gihisgutan sa programang RaJoe Serbisyo ang bag-ong serbisyo sa Davao Light & Power Company (DLPC) nga Mobile AP app para sa mas klarong serbisyo alang sa katawhan.
Gibutyag ni DLPC Branch Head Paul Michael Cazar nga mi-upgrade sila sa mobile app kay aron mas mapakusog pa ang kasinatian sa mga kustomer. Dugang pa niya, “Ang satisfaction sa mga kustomer ang among nag-unang prayoridad, mao nga ang Davao Light padayon nga nagahimo og mga kalamboan sa Mobile AP.”
Makatan-aw na ang mga kustomer sa DLPC sa ilahang binuwan nga bayranan sa kuryente sa ilang labing kombenyente nga oras pinaagi sa MobileAP app.
Gawas sa pagtugot sa mga kustomer sa pagsusi sa ilang binuwan nga bayranan sa kuryente, ang MobileAP nagtugot kini sa pagtan-aw sa kasaysayan sa pagbayad o payment history sulod sa milabay nga dose (12) ka bulan. Matan-aw ang mga consumption charts aron matabangan nga mamonitor ang energy consumption, pagrehistro sa daghang Davao Light accounts, ug pagsusi sa listahan sa mga opsyon sa pagbayad.
Dugang pa niini, ang MobileAP dili lang maghatag og kasayon apan makatabang usab sa mga kustomer sa paglikay sa paggawas ug luwas sa COVID-19 tungod kay ang mobile application makahatag kanila ug tabang.
Giawhag ni Cazar ang mga kustomer nga i-download ang MobileAP nga libre sa Play Store o App Store pinaagi sa pag-type sa “MobileAP” o “Davao Light” sa search bar.
Alang sa mga pangutana kabahin sa Davao Light & Power Co. Panabo Branch mamahimong i-kontak ang numerong 229 3572/655-3572 o bisihaton ang Facebook nila sa https://www.facebook.com/DavaoLightOfficial.
| Tim Acebedo, CIO-PIRO
📸IDOB, CIO-PIRO
