Gipasigarbo sa Panabo City Senior High School Principal Myrna E.Purificacion sa RaJOE Serbisyo Program sa 94.3FM adtong Hunyo 29, 2021 ang ilang inisyatibong WATCH Me: Mentoring to Excellence Program diin nagahatag sila og panahon nga makatudlo og mga bagong systema nga makatabang sa mga pampublikong eskwelahan.

“Nagconduct me og WATCH sa ubang school pinaagi sa online kay delikado pa tungod sa COVID-19,” ingon pa ni PCSHS WATCH Coordinator Maria Fe T. Balatero. “Open among school kung naay gusto e-adapt ang among mga best practices.”

Ang mga eskwelahan sama sa JP Laurel Elementary School ug Malativas Elementary School nahimong benepisyaryo sa ilang programa ilawom sa We Advocate for Time Consciousness and Honesty (WATCH) Project.

Sa laing bahin, mahinumdoman nga ang PCSHS ang kauna-unahang nagpahigayon og “Virtual Graduation Ceremony” sa tibouk rehiyon sa Davao. Sulod sa kapin usa ka bulan nga pagplano ug pag-organisar, nahitabo ang maong seremonya adtong Mayo 13,2020 diin wala nahimong babag kanila ang hulga sa pandemya.

“Dili ni mahitabo kung walay teamwork,” ingon pa ni Purificacion human sa iyang pagpasalamat sa mga personahe sa PCSHS nga mitabang. Nagpasalamat usab siya sa suporta ni City Mayor Jose E.Relampagos, Congressman Hon. Alan R.Dujali, ug Panabo City Schools Division Superintendent Reynante A. Solitario.

Ang WATCH usa ka proyekto nga gi mugna sa Junior Chamber International (JCI) ug kasamtangan nga ginaduso sa Department of Education.

Sa dugang detalye, mamahimong motan-aw sa live streaming sa RaJOE Serbisyo sa
https://www.facebook.com/panabocityofficial/videos/559310908566400

Ang RaJOE Serbisyo Program sa 94.3 Dream FM ginapahitabo kada lunes hantod biyerness, 8:00 sa buntag kauban ang City Information Office sa Panabo.

|D.Balogbog