Agosto 18, 2021 — Gipahigayon ang opisyal nga pag-abri sa Kadiwa Retail Market (KRM) alang sa Rural Improvement Club Agri-Vendors Association (RICAVA) sa Barangay Salvacion, Panabo City nga nagasuporta sa Enhanced Kadiwa ni Ani at Kita Inclusive Food Chain Supply. Nanguna si City Agriculturist Dr. Samuel N. Anay sa ribbon cutting ceremony kauban ang Barangay Captain sa Salvacion nga si Hon. Anacleto A. Plasabas, BANWAG Program Coordinator Allan Sarabia isip representante ni City Mayor Jose E.Relampagos, ug Rural Improvement Club Federation President Ma. Enone G. Dela Cueva.

Matod pa ni Anay, ang isa sa gitutokan sa Agriculture Sector kay ang matabangan ang lokal nga merkado hilabi na ang mga manindahay. Dugang niya, “Paningkamotan nato nga ang tanang barangay mabutangan og Kadiwa Retail Market aron direkta na nga ang mga farmer producers ang mobaligya sa ilang kaugalingong produkto.”

Sumala pa Mayor Relampagos pinaagi kay Sarabia nga pirmente siyang ga huna-huna sa katawhan sa Panabo. Ang programa sama sa Kadiwa Retail Market kay dako og tabang sa mga lokal nga manindahay. Dugang pa niya, “Nindot kaayo motabang sa mga tawo nga nagapaningkamot kay isa kini sa rason nga molambo og maayo atong siyudad maong tabangan gyud dapat ang mga lokal nga manindahay.”

Mapasalamaton pud si RIC Federation President Dela Cueva tungod sa dakong suporta nga ilang nakuha. “Nagdahom ko nga naay mamalit kanunay kay aron pirmente na ang Kadiwa Retail Market sa Barangay Salvacion,” ingon pa niya. “Daghan ang produkto sa RIC, maglisod lang gyod mi og pamaligya kay wala mi saktong lugar para mamaligya. Karon bentaha na kay naa nay mga KRM.”

Nitambong sa seremonyas sila Acting Assistant City Agriculturist Rolando Tuazon, Barangay Captain sa Salvacion Anacleto A. Plasabas, Agriculturist I Andrea Galaura, ug RIC President sa AO Florendo Mark Veisar Maghalin.

Gilaoman nga magpadayon pa ang programa ug daghan pa nga barangay ang mabutangan og Kadiwa Retail Market.

| Tim Acebedo, CIO-PIRO
📸 | Rommel Cayas