Usa ang Barangay Maduao sa nakatagamtam og programang Revitalized PNP Kasimbayanan ug BIDA program sa Philippine National Police Panabo sa Barangay Maduao Gym, adlawng Enero 17, 2023.

Target niini ang mga IPs, Persons Who Use Drugs (PWUDS), barangay officials ug functionaries na makatambong sa maong kalihokan. Adunay lecture proper na hatod ni PSMS Randy Sta. Maria kabahin sa mga pagpatin-aw ug pagsabot sa mga problema nga gidala sa paggamit sa droga ug pagsulbad sa hinungdan sa pagkaadik. Ani pa niya, “Isip mga hamtong sa panimalay, bantayi ninyo ang inyong mga bata o mga kauban kung naunsa na sila.” Gitanyag usab ni Sta. Maria ang sintomas kon ugaling ang usa ka tawo kontrolado sa mga ilimnon ug bawal na gamot.

Atol sa kalihokan, naghatag usab og libreng gupit ug skills training sa Liquid Detergent making ang PESO Panabo aron makadugang og kahibalo sa mitambong ug magamit nila sa umaabot.

Ang KASIMBAYANAN o Kapulisan, Simbahan, at Pamayanan ug Buhay Ingatan Droga’y Ayawan (BIDA) program nagasugyot sa malampusong koneksyon tali sa kapulisan ug komunidad aron mas lig-on na panag-uban sa mga katawhan pinaagi sa mga serbisyong naipaambit na makita ang kalinaw sa matag usa.

Nakigduyog sa kalihokan sila Provincial Explosives Ordinance Disposal and K9 Unit PMSG Marlon Careñosa, Intelligence and Investigation Officer PCAPT Manuel Aspellaga, PESO Employment Focal Lysander V Gran, ug si PNP life coach Pr. Fred Porcalla.

Photos| R. Cayas
|M. Lagura