October 1, 2021 – Nagpadayon ang supporta ni Mayor Jose E. Relampagos sa Department of Education- Panabo Division pinaagi sa pagtunol sa 61 ka laptops ug 15 desktop computer alang sa mga pampublikong eskwelahan sa siyudad sa Panabo. Ang maong mga gadgets naggikan sa Special Education Funds sa City Government of Panabo nga mikantidad og P2,702,848.00.

Usa kini sa importanteng gikinahanglan sa mga tulunghaan aron mapadayon ilang pagtabang sa mga estudyante sa ilang pagtulun-an ilawom sa DepEd Learning Continuity Plan.

Sa Facebook post ni ni Schools Division Superintendent Dr. Reynante A. Solitario, EdD, CESO VI gibutyag iyang dakong pagpasalamat kay Mayor Relampagos sa kanunay nga supporta kanila sugod pa sa pagbuto sa hulga sa COVID-19. Ingon pa niya nga, “Very thankful mi sa unending support ni Mayor Joe ilabi na ang pag-approve niya sa more than 3 Million (Pesos) for purchase of heavy printing machines for module reproductions sa tuig 2020.”

Nahinumdoman nga nagsuporta ang Lokal nga Panggamhanan niaging tuig og mga riso machines ug wifi modems para sa pag-implementa sa distance learning.

|Ivory Dawn Balogbog, CIO-PIRO