Gi-endorso na sa DepEd – Division of Panabo City ang tulo (3) ka tulunghaan nga pwede na mag limited face-to-face (F2F) classes sa siyudad sa Panabo, mao sila ang: Katualan Elementary School, Roxas Elementary School sa Barangay Lower Panaga, ug Waterfall Elementary School.
Usa sa mga rekisitos sa F2F classes kay ang pagtugot sa LGU kung asa nahimutang ang eskwelahan. Apan human sa IATF meeting adtong Pebrero 24,2022, girekomenda nga ipa-assess pa sa local IATF ang mga lakang sa mga piniling eskwelahan alang sa umaabot nga F2F. Sumala pa ni Assistant City Health Officer Dr. Eranie Pangilinan nga ilaha usang susihon pag-ayo ang mga tulunghaan ilabi na ang pagmonitor sa safety ug standard protocols aron walay abiryang mahitabo panahon sa pagpatuman niini.
Subay ang pagpili sa Joint Memorandum Circular No. 001 of 2021 sa Department of Education (DepEd) and Department of Health (DOH) . Ingon pa dinhi, kinahanglan ang usa ka eskwelahan: (1) ga-implementa sa School Safety Assessment Tool (SSAT), (2) nakapailawom sa Alert level 2 ang Division, (3) bakunado nga mga teachers, (4) adunay pagtugot sa mga ginikanan ang bata nga mag F2F classes, ug (5) pagtugot gikan sa Lokal nga Panggamahan apil na ang pakiglambigit sa City Health Office na masiguro nga gituman gayod sa maong tulunghaan ang mga safety ug standard protocols.
Sa milabay nga tuig, naghimo na og mga lakang ang DepEd Panabo aron mapatuman ang limited F2F classes sama sa pag-implementa og assessment gamit ang SSAT. Gisiguro usab sa DepEd Division Panabo nga ilahang i-monitor ang mga pagpatuman sa safety and standard protocols sa mga tulunghaan.
Human nga gideklara ang Davao del Norte nga anaa sa Alert Level 2 System pinaagi sa IATF Resolution No. 161-A adtong Pebrero 14,2022, nahimo kining basehan sa pagpahigayon og F2F classes. Suportado kini mismo ni Education Secretary Leonor Magtolis Briones pinaagi sa pag-endorso sa ‘Progressive expansion of face-to-face classes’ kay President Duterte nga tugotan ang F2F classes sa mga lugar nga low-risk sa COVID-19.
|I.Balogbog, CIO-PIRO
