Marso 26, 2021- Kapin 20,000 ka tilapia fingerlings ang gihatag sa City Government of Panabo, pinaagi sa City Agriculture’s Office, sa mga benepisyaryo nga taga Purok 3, Barangay Consolacion alang sa ilang panginabuhian. Tubag kini ni City Mayor Jose E.Relampagos sa hangyo mismo ni Barangay Captain Hon. Pablito L.Tocmo, Sr. gumikan nga adunay sapa sa ilahang purok.

“Akong nakita nga ang akong mga sakop sa barangay kay halos nagsalig sa sapa. Sa permanenteng pangisda nila sa sapa naga gamay ang ilahang kuha so mao ni karon na akong girequest sa City of Panabo ug akong gi-address kang Mayor,” sumala ni Tocmo. Nagpasalamat usab siya kay nahitabo ang iyang pangandoy nga makatabang sa katawhan sa maong barangay.

Malipayon usab si Melchor D.Buino ng usa ka fisherfolk sa barangay nga na apil siya sa makapahimulos sa maong programa. Matod pa niya, “Wala gyud mi gipasagdan sa among kapitan ug gitagaan mi ni Mayor og pamaagi nga makadugang sa among panginabuhian. Daghang salamat kay gihatagan mi og pagtagad diri sa Barangay Consolacion.”

Duyog sa kalihokan sila City Agriculturist Samuel N. Anay, Senior Agriculturist Arponiano N. Niñeza, Banwag Coordinator Allan C. Sarabia, Provincial Agriculturist Jose L. Andamon, Barangay Consolacion Captain Hon. Pablito L. Tocmo Sr., Barangay Consolacion Councilor Hon. Romeo L. Caño, Barangay Salvacion Councilor Hon. Calixto S. Arcena, Cloribencita D. Silvosa ug si Roy Vicilla.

| Margot Lagura/CIO-GIP
Photo by: R. Cayas