Hulyo 19,2021 — Usa ka adlaw bago iselebrar ang Eid Al-Adha, giturn over ngadto sa Lokal nga Panggamhanan ang 18,353 sqm nga luna sa Barangay Datu Abdul Dadia alang sa kamusliman sa siyudad sa Panabo. Himoon kini ni City Mayor Jose E.Relampagos nga usa ka “Muslim Cemetery”.

“Naghinaot ko nga makatabang ni ilabi na sa atong mga kaigsuonang Muslim aron aduna na silay pampublikong sementeryo,” ingon pa ni Mayor Relampagos. Dugang pa ni Mayor Relampagos nga adunay mga programa ug mga proyekto ang gimugna sa lokal nga panggamhanan alang sa mga Muslim Community sa Panabo City.

Mapasalamaton si Liason Officer of Muslim Affairs, Abdullah Señoda kay City Mayor Jose E.Relampagos alang sa luna nga ilang mapahimuslan. Dugang pa niya, “Dako kaayo ni og tabang alang kanamong mga Muslim diri sa city sa Panabo kay kining luna magsilbi nga libingan kadtong mga mupanaw na mga Muslim.”

Gilaoman nga magamit na ang luna sulod sa tuig 2021.

| Sonny L. Calizar, CIO – PIRO
📸 | Rommel Cayas