Pebrero 18, 2022 – Gipasidunggan sa maayong buhat ang usa ka traysikad driver na si Junifel B. Toledo, Sr. nagpuyo sa Purok Cabbage, Barangay Gredu, Panabo City, isip usa ka honest panaboan tungod kay aduna siyay nakita nga kabtangan sama sa cellphone nga gipanag-iyahan ni Princess Amor Devera.

Matod pa ni Devera sa iyahang facebook post nga, around 5pm migawas siya og hospital ug nisulod sa sakyanan, wala siya kabalo nga nahagbong na ang iyang cellphone. Atong panghitaboa, naay gihatod si Toledo na pasahero gikan sa mall ug ninaog sa Somoso Hospital diin didto nakita ang cellphone nga anaa sa dalan. Naa daw nagatawag sa maong cellphone ug dili matubag ni Toledo kay dili siya kabalo ug na-lowbatt. Iya dayon kininig gidala sa technician aron makontak ang maong tag-iya. “Buotan ug matinud-anon wala magpadala sa kapait sa panahon,” gipahayag ni Devera sa post.

Giila si Toledo sa Lokal nga Panggamhanan sa siyudad pinaagi kay Executive Secretary Josie Mary Relampagos sa iyahang inisyatibo nga walay pagduha-duhang ihatag sa tag-iya ang butang adtong Pebrero 15, 2022. Talagsaon na pamatasan ang gipakita ni Toledo ug siya nagsilbi isip ehemplo sa katawhan na gamiton sa maayo ang buhat aron luwas sa daotang konsensya. Lakip niini, aduna pud siyay nadawat nga plaque, personalized mug, ug bugas na gikan sa LGU Panabo.

Alang sa mga nakakita og kabtangan ug gusto iuli, mamahimong moadto sa City Administrator’s Office nga nahimutang sa 3rd Floor, New City Hall, Barangay JP Laurel, Panabo City ug pangitaa si Nilda Cuantioso aron mauli sa tag-iya ug magawaran og pag-ila.

l M. Lagura
Photos: A. Castilla