GISIGURO karon sa Lokal nga Panggamhanan sa Panabo, pinaagi sa City Environment and Natural Resources (CENRO), ang pagpugong sa yutang modahili daplin sa kasapaan pinaagi sa Riverbank Easement Tree Planting nga gipahigayon sa Barangay Waterfall, Panabo City adtong Oktubre 12, 2021. Ang kalihokan gimugna isip dugang pamaagi nga mapugngan ang posibleng pagbaha.

Sa programa, adunay gitanom ang singkwentay dos (52) ka mga partisipante sa nagkalain-laing kooperatiba sa siyudad na kapin 300 ka mga malibago na klase sa kahoy.

Matod ni Environmental Protection and Natural Resources Management Section Sr. EMS Mario R. Paña, nga paspas motubo ang malibago nga kahoy maong gipili nila kining itanom sa luna. Dugang pa niya, “Ang mga gamot sa Malibago naay kapasidad nga mogunit ug mopugong sa yuta aron di modanlas nga maoy hinungdan sa pagbaha.”

Naghatag og mensahe si Paña sa mga lumulupyo sa siyudad na panahon na nga magtanom og kahoy aron mamintinar ang kaayusan sa kinaiyahan ug para pud sa umaabot na katuigan.

Ang maong kalihokan subay sa pagsaulog sa National Cooperative Month nga mahitabo kada bulan sa Oktubre.

l M. Lagura
Photos: CENRO Panabo