“YES, MAYOR”

Tataw ang kalipay sa 46 ka mga magtiayon human sila gideklarang legal na nga bana ug asawa ngadto sa Panabo Multipurpose Tourism Cultural and Sports Center sa adlawng Marso 18, 2022.
Ang Lokal nga Panggamhanan pinaagi sa City Civil Registrar (CCR) ug Philippine Statistics Authority (PSA) nahatagan og higayon ang mga magtiayon na mapermanente ang ilahang panag-uban sa tibook katuigan.

Isip amahan sa siyudad, nagpahimangno si City Mayor Jose E. Relampagos sa bag-o na mga magtiayon na dili kalimtan na magsinabtanay ug magmaningkamot sa pagsulod ani nga obligasyon, importante nga anaa gyud pundasyon. “Kinahanglan naay trabaho kay unsaon pagbuhi sa atong pamilya, dili ta magsalig sa atong ginikanan. Ningsulod ta aning kaminyoon, importante na lig-on ta ug atimanon ang atong mga anak o pamilya.”

Gibutyag usab ni Relampagos na ang kinabuhi mura og ligid na panagsa anaa sa ilawom ug kung ingon ani man, dili ta mawad-an og paglaum, “Kinahanglan magtuyok gyud ta aron hayahay ang tagsa nga pamilya,” dugang pa niya.

Saksi ang mga bisita sa malampusong seremonyas na gipahigayon ug niuli nga malipayon ug ga-laom sa mabungahong panag-uban sa mga magtiayon.
Sa mga gikasal, mamahimong kuhaa ang inyong Wedding Frame sa City Information Office sa 2nd Floor, New City Hall, Barangay JP Laurel, Panabo City.

l M. Lagura
Photos: E. Pan