Subay sa mando sa DILG ug DBM, ang Lokal nga Panggamhanan sa Panabo naghatag og orientation kabahin sa preparasyon sa “Devolution Transition” o ang pagpakanaog og badyet, lakip na ang uban nga mga programa, proyekto, ug aktibidades gikan sa mga nasyonal nga mga ahensya sa gobyerno padulong sa mga lokal nga panggamhanan. Gilaoman nga ang dugang nga serbisyo nga mapanaog sa mga LGUs masmakahatag og tabang sa mga panginahanglanon sa katawhan.

Ang pagpakanaog sa mga serbisyo resulta sa pagdaog sa kaso nila congressman Mandanas ug Garcia batok kay Executive Secretary Paquito Ochoa ug sa iyang kauban sa gabinete ni dating Presidente Benigno Aquino, Jr. kabahin sa insaktong pagbahin sa national taxes alang sa mga LGU.

Tungod niini, gikinahanglan planohon sa mga lokal nga panggamhanan lakip na ang mga barangay LGU ang pagplastar sa ilang kaugalingon nga mga kalihokan bago mahatagan og badyet nga gigahin alang kanila.

Ang mga ahensya nga mopakanaog og mga programa kay ang DPWH, Department of Tourism, Department of Energy, Department of Information and Communications Technology, DSWD, Department of Trade and Industry, Department of Agriculture, ug uban pa.

Ang mga partisipante sa orientation kay ang mga barangay kapitan kauban ilang secretary, treasurer, usa ka kagawad, ug duha ka representante gikan civic society organization o people’s organization nga anaa sa ilang mga barangay.

Gawas sa 20 ka mga barangay nga target magpartisipar sa unang adlaw nga orientation, 19 lang ang nitambong. Ang mga barangay nga mitambong mao ang Buenavista, Cacao, Cagangohan, Consolacion, Dalisay, Dapco, Datu Abdul Dadia, Gredu, J.P. Laurel, Kasilak, Katipunan, Katualan, Kauswagan, Kiotoy, Little Panay, Lower Panaga, Mabunao, Maduao, ug Malativas. Sa Septyembre 7 na usab ang sunod 20 ka mga barangay.

Si City Administrator Pedrito A.Misoles ang naghatag og rationale o background information sa mga partisipante isip co-Chairperson ni City Mayor Jose E.Relampagos sa Devolution Transition Committee. Anaa pud si City Budget Officer Joven M.Sepe alang sa pagtubag sa mga pangutana ug si Zoning Officer III ug Technical Working Group Head Karen Ann Maquilan alang sa paghatag og detalye sa plano.

Ang kalihokan misubay usab sa minimum public health protocol.

| city information office