Wala damha ni Bonifacio Mahinay, taga Purok 1, Barangay Dalisay, Panabo City, na makakita siya og kabtangan ilabi na nga mahalon nga cellphone kini nga gipanag-iyahan ni Hazel L. Teves, usa ka maestra sa Cagangohan Elementary School, adto sa may Water District, alas dose sa udto sa adlawng Enero 30, 2022.

Matod pa niya samtang namasada siya, adunay sidecar ang iyang gisundan ug pagliko niini sa kanto, nabantayan ni Mahinay ang cellphone nga natagak gikan sa tag-iya, daling siyang nihunong ug gikuha ang maong kabtangan. Apan, wala na niya masundan ang sidecar nga gisakyan sa tag-iya kay nag-traffic na ug wala na niya makita kini ug nidiretso siya sa DAPCO Terminal aron ihatod ang iyang mga pasahero.

Nidagan pa og pila ka adlaw bago sila nagkita ni Ma’am Hazel aron iuli ang cellphone kay dili sila mag-abot tungod sa oras ug trabaho. Gitabangan siya sa iyang anak na mauli ang kabtangan pinaagi sa pagkontak sa tag-iya. Ingon pa niya, “Nakulbaan ko ma’am kay naay storya-storya nga basin mapriso daw ko kay dugay nako nauli. Ang naa gyud sa akong hunahuna ato na iuli gyud nako na kay di mani akoang gamit gud.”

Nakadawat si Mahinay og plaque, bugas, ug personalized mug na gikan sa Lokal nga Panggamhanan adtong Pebrero 14, 2022 pinaagi kay Executive Secretary Josie Mary Relampagos, ug kwarta na gihatag gikan sa mismong tag-iya sa cellphone.

l M. Lagura
Photos: E. Pan