Gipagawas na ang City Ordinance No. 11-2021 o naila nga “No Build Zone Along the Mindanao Railway Project Alignment Ordinance of Panabo City” diin polisiya sa siyudad na mamentinar ang kahapsay ug mapanalipdan ang katawhan sa posibleng aksidente na mahitabo sa ipatukod na Mindanao Railway Project.
Gipakita usab ang mga reference points sa “No Build Zone” ilalom sa Panabo – Right Of Way Boundary Coordinates. Ang mga barangay nga maigo mao ang mga barangay sa Quezon, Southern Davao, Datu Abdul Dadia, New Visayas, Little Panay, Maduao, Tagpore, ug San Nicolas.
Sa Section 6 sa ordinansa, gipahimangnoan ang mga katawhan nga walay ni bisan kinsa ang mo okupar dool sa maong mga luna, pribado man o gobyerno. Gidili usab ang pagbutang og koral ug mga perimeter walls nga walay kalabutan sa proyekto gawas lang kung kini alang sa kaluwasan sa katawhan.
Kung mahitabo man nga naa na daan natukod nga kabtangan sulod sa “No Build Zone”, mamahimo kining gub-on human mapahibalo kanila pinaagi sa notice ug hearing.
Adunay ipahamtang nga multa ang musuway sa maong ordinansa. Magbayad sila og P2,000-5,000 o pwedi makulong og tulo (3) hantod unom (6) ka bulan.
Ang Phase 1 sa Mindanao Railway Project pahitaboon sa unang mga bulan sa tuig 2021. Ang non-electrified ug single track nga railway adunay katas-on nga 105 ka kilometro ug mo-agi kini sa wala (8) ka stations: Tagum, Carmen, Panabo, Sta. Cruz, Digos, ug tulo ka area sa Davao City.
Ang ordinansa, na gisulat ni City Councilor Hon. Gregorio U.Dujali,III, epektibo nang ipa-implementa human kini gi-aprobahan ni City Mayor Jose E.Relampagos adtong Abril 14,2021.
Kung adunay pangutana, pwede manawag sa Zoning Section sa City Planning and Development Office sa numerong (084) 823-4600 o bisitaha ilang opisina sa 2nd Floor, New City Hall.
| Ivory Dawn Balogbog, CIO
