Hunyo 11, 2021 — Sa pagpadayon sa Virtual Trabaho Negosyo Kabuhayan Fair sa iyang ikaduhang adlaw, gipahigayon ang Job Fair diin nagkalain-laing kompanya ang naghatag og panahon sa pagpangita og mga aplikante pinaagi sa online interview. Gikan sa trabahong pang-lokal hantod sa trabahong pang-abroad, ang Public Employment Services Office (PESO) sa Panabo naghatag og opportunidad sa tanang aplikante nga nag rehistro sa ilang Job Matching Portal.

Sumala pa ni Special and Local Recruitment Activity Focal, Keir Jay Balingan, nga ilang paningkamotan nga mapataas ang hiring rate aron mas mapadaghan ang makadawat sa trabaho. “Amoang gina-share sa among facebook page ug sa social media account sa City Government of Panabo ang mga programa sa PESO Panabo aron ma-aware ang tibook banay sa mga job seekers dili lang sa Panabo pero apil pud ang katapad na mga lungsod,” saysay pa ni Balingan.

Usa sa nitambong kay si Alfie Reputana 42 anyos nga taga Davao City human nagresign kini sa private company ug ni-apply siya og trabaho sa LGU Panabo. “Gikan ko sa private company pero mas okay man mga benefits sa government maong nagbakasakali ko nga nag-aplay.”

Anaa usab ang walk-in Job Fair alang sa mga aplikanteng walay gamit sa pagpangapply online ug sa mga walay kahibalo sa paggamit og teknolohiya diin ang mga personahe sa PESO naghatag sa ilang oras aron moalalay sa mga aplikante. Bisan pa man, gisubay ang health protcols sama sa pagsuot og face mask ug face shield aron malikayan ang pgtakod sa 2019 Coronavirus Disease.

Ang Virtual TNK Fair usa ka programa sa Lokal nga Panggamhanan sa Panabo pinaagi sa PESO Panabo pinaagi sa ilang pakig-alayon sa Department of Trade and Industry. Kauban usab ang Smart Communications Company isip internet provider sa maong kalihokan.

Alang sa mga nangita og trabaho, mamahimong mobisita sa PESO Panabo nga nahimutang sa Panabo Parks and Plaza, New Pandan, Panabo City. Tungod sa kwarantina, pwede magbisita sa PESO Panabo City facebook page ug e click ang link sa Job Matching Portal.

| Sonny L. Calizar, CIO – PIRO