Enero 7, 2022 – Giistoryahan sa programang RaJoe Serbisyo sa 94.3FM, Dream Radio ang bag-ong pasilidad sa Panabo nga Sanitary Landfill kauban si Engr. Felix Jonases P. Senajon. Mahinumduman nga opisyal na nga giturn-over sa ARN Builders ang Sanitary Landfill Facility (SLF) sa Lokal nga Panggamhanan adtong Prebero 2, 2022 nga nahimotang sa Purok 5, Barangay Waterfall.
Butyag ni Engr. Senajon nga taas ug lisod ang nahimong proseso alang sa SLF. Adunay mga negatibong impresyon ang pagpatukod niini ilabi na sa mga lumulupyo sa Barangay Waterfall apan nahinay-hinayan na kini og pasabot sa katawhan nga ang Sanitary Landfill kay ‘environmental friendly’ nga pasilidad. “Ang SLF sa Panabo nakadisenyo nga luwas nga disposal facility,” dugang pa niya.
Ang Sanitary Landfill usa ka pasilidad para sa paglabay og “residual waste” nga gitugot ubos sa Republic Act 9003 o ang Ecological Solid Waste Management Act of 2000 ug sa Panabo City Ordinance No. 28 of 2005.
Aduna kini usa ka Administrative Building, Watch Tower, Material Recovery Facility, Weighing Bridge, Wash Bay, Waste Disposal Cell/Pit, Waste Water Treatment Facility, Drainage, ug Guard House. Mikantidad usab ang konstraksyon sa SLF og P82.9M gawas sa kantidad sa 10.3 ektaryang yuta.
Gihisgutan usab ang City Ordinance No. 37-2021 o ‘An Ordinance Providing Rules, Penalties, and Regulations in the Operation of Panabo City Sanitary Landfill Facility. Ang tipping fee sa mga molabay nga taga Panabo kay P2.00 matag kilo ug kung gikan sa ubang LGU, lokalidad, ug entidad kay P2.50 matag kilo.
Ang mga paglapas ug ang mga silot sa maong ordinansa, mao ang mosunod:
• Paglabay sa wala masegregate nga basura
• Paglabay sa basura nga walay awtoridad o balido nga dumping permit
• Dili awtorisado nga pagpamasura
• Illegal nga pagsulod/paglapas
• Paglabay sa kemikal, pathological, maka-impeksyon o medikal nga basura
• Pagsulod sa garbage truck sa SLF nga walay bisan unsang ‘form’ sa cargo covering
▶️ Unang paglapas – P500
▶️ Ika-duhang paglapas – P1,000
▶️ Ika-tulong paglapas – P3,000
Dugang saysay ni Engr. Senajon nga ang mga barangay, ug ang mga trak sa gobyerno kay dili obligado nga mobayad kung molabay sa SLF.
Gipahimangnoan usab ang katawhan nga ‘RESIDUAL WASTE’ lamang ang puwedeng ilabay sa SLF o ang mga basura nga ‘none biodegradable’ nga gikonsedera nga ‘non-recyclable’ ug ‘re-usable’.
Gilaoman usab nga karong bulana sa Pebrero makonekta na ang SLF sa Davao Light & Power Co. alang sa kuryente niini aron magamit nagyod ang maong pasilidad.
Alang dugang kahibalo sa panaghisgot, mamahimong bisitahon ang City Government Facebook page o i click ang link https://fb.watch/b0v3B-Brdj/
✍️ | Tim Acebedo, CIO-PIRO
📸 | Francis Paculanang, CIO-MULTIMEDIA
