Wala nagpaulahi sa pagpakita sa ilang ka-hawod ang mga partisipante sa Cake Decorating ug Fruits and Vegetables Carving Competition adto sa Panabo Multipurpose Tourism Cultural & Sports Center sa adlawng Oktubre 6, 2021.

Sumala pa ni TESDA Davao Del Norte Director Remegias G. Timonio, ang gipahigayong kalihokan nagapamatuod kung unsa ka creative ang mga panaboans. Dugang pa niya, “This is the only LGU that has sustained the conduct of skills competition despite of Pandemic.”

Adunay tulo (3) ka paresan sa Cake Decorating ug upat (4) ka indibidwal sa Fruits and Vegetables Carving ang nagtigi sa panag-indigay. Usa sa mas gipatugbaw nga criteria sa duha ka kompetisyon aron madaog mao ang kahinlo sa proseso, kanindot sa resulta, pagkakonektado sa tema ug ang pagkakomplikado sa gibuhat.

Napili ang disenyo nila Christy Jane Ramirez ug Kirby Shayne R. Dumanon sa Cake Decorating ug ni Francisco A. Guarino, Jr. sa Food Carving human nila nasungkit ang dako nga puntos gikan sa mga hurado. Ang tanang mga nadaog makadawat og certificate ug cash prizes.

Mao kini ang ubang nakadaog:

(Cake Decorating)
2nd – Ryle Yecyec & Marris Yecyec
3rd – Ivy Pugoy & Cherry Galaura
(Fruits and Vegetables Carving)
2nd – Jerry Nebria Ando
3rd – Marlo P. Bulgas
4th – Jericho Refuela

Nagpaabot og pagtimbaya si Kirby Shayne Dumanon, usa sa nadaog sa Cake Decorating. “Dako kaayo mi og pasalamat ilabina sa LGU Panabo pinaagi sa PESO kay maskin anaa ta sa pandemic, nakapahigayon gihapon sila og skills competition,” saysay pa niya. “Makatabang ni sama nako nga wala ko nag-expect nga naa diay koy skills nga ginatago sa baking.”

Duyog sa kalihokan si Executive Secretary Josie Mary G. Relampagos ug Assistant City Administrator Brenda A. Sauping isip mga representante ni City Mayor Jose E. Relampagos, PESO Manager Cherelle B. Espinosa, Board of Judges na sila Alexander D. Bumanlag, Joahna Kaye C. Cubero, ug Kris L. Marces.

Subay ang panghitabo sa 9th Binulig Festival sa siyudad nga adunay temang, “Pagpasalamat. Panaghiusa. Pagbarog Luyo sa Pandemya. Panaboans, Duyog Ta!”

| M. Lagura
Photos: Aljun Castilla