Base sa impormasyon gikan sa City Health Office-Population Management Unit gikan Enero hantod Marso 2021, anaa na sa 117 ang kaso sa teenage pregnancy sa Siyudad sa Panabo. Ang “teenager” gi-ilang mga naga edad og 10 anyos hantod 19 anyos.

Nakita usab sa Philippine Commission on Women and Commission on Population and Development (POPCOM) nga mas misaka pa ang kaso sa teenage pregnancy sa tibuok nasud hinungdan sa lockdown o kwarantina tungod sa Covid-19.

Tungod niini, gideklara ni Presidente Rodrigo Duterte nga himuong prayoridad nga malikay sa pagbuntis ang mga kabatan-onan sa tibuok nasud. Nagpagawas usab og Executive Order No. 141 si President Rodrigo Duterte adtong Hunyo 25, 2021, nga hatagan ug pagsulbad ang pagtaas sa ihap sa mga mabdos nga kabatan-onan.

Sa karon, ang Population Management Unit nangita og pamaagi nga mapa-abot sa social media ang ilang mga programa sa matag barangay pinaagi sa Adolescent Health Program aron maminosan ang teenage pregnancies sa Panabo.

Matod pa ni Adolescent Health and Development Coordinator Carlyn T.Quieta, RSW, MSSW, nga kasagaran sa hinungdan sa teenage pregnancies kay ang problema sa pamilya. “Wala gyud silay mga emotional attachments sa ilang parents. Kasagaran gyud sa ilaha, na belong sa broken family. Dili pud sila open sa ilang parents mao nang mas attached sila sa uban,” dugang ni Quieta. “Nakita namo nga ang batan-on kulang sa information.

Kailangan gyud sila tutokan ug pasabton kung unsa ilang dangatan og mahitabo sa ilaha ang sayo pag buntis.”
Sa datos balik adtong tuig 2017, nahimong Top 1 sa kaso sa teenage pregnancy ang Davao Region sa tibook Pilipinas nga adunay average nga 17.09%.

| M. Gentiles