Panabo City — Nagpahigayon og benchmarking ug site visitation ang mga representante ug opisyales sa tulo (3) ka ARB Banana Cooperatives gikan sa Municipality of Carmen sa Laboratory sa Barangay Datu Abdul, Panabo City aron maton-an ang “technology adopters” sa City Agriculture’s Office nga makatabang sa pagkunhod sa problema sa mga kasagingan — ang Fusarium wilt.

Ang LGU-Panabo pinaagi sa Research Section sa City Agriculture’s Office nagsugod sa pag-establisar og lokal nga produksyon sa Trichoderma harzanium diin usa kini ka maayo nga fungus nga girekomenda sa Department of Agriculture-RFO XI.

Sa inisyatibo ni Senior Agriculturist Teresa B. Balmores, nagsugod adtong 2019 ang produksyon sa laboratory. Ang lokal nga pundo kay gigamit aron adunay andam nga mga Tricho packs nga mahatag sa mga local banana farmers diin nagkugi sila sa pagpamutang sa mga apektado nga mga sagingan.

Ang maong mga kooperatiba ningbisita usab sa Barangay Manay para mag-obserba sa sagingan ni Leonardo Longno, isa ka Cavendish Banana Grower, nga nagagamit sa T. harzanium.

Matod pa ni Leonardo nga sobra na siya tuig nga nagagamit sa Trichoderma harzanium. Ginabutang niya ang biocon matag bulan ug ang ubang organic concoctions nga iyang gihimo ug estrikto niyang gina-obserba kini. Tungod sa T. harzanium, ang iyang Cavendish Banana naayo gikan sa Fusarium wilt ug nakasustener sa produksyon sa Cavendish Banana.

Ingon pa ni Balmores nga walay undang ang suporta sa LGU ngadto sa mga banana farmers. Gipangitaan pa pud og pamaagi sa City Agriculture’s Office sama sa indigenous organisms nga nakitang sulit ug eco-friendly para mapugngan ang daotang epekto sa Fusarium wilt.

Ang mga Carmen ARB Banana Cooperative mao ang Bagong Silang Banana Growers MPC, Diamond Agrarian Reform Beneficiaries MPC-D, ug WODEMPCO.

| Tim Acebedo, CIO-PIRO
📸 | Rommel Cayas