Sa meeting sa Panabo City IATF kauban ang mga opisyales sa Provincial Government sa adlawng Disyembre 11,2020, gireport sa City Health Office nga 117 ang migawas nga positibo sa COVID-19 human nahitabo ang Aggressive Community Testing sa Department of Health nga gipartisiparan sa 1,008 ka mga persons under monitoring o PUM. Sa 117, 51 niini adunay exposure o travel history sa Premiumed Market (Wet Market).

Tungod niini, girekomenda sa Provincial IATF nga gipangulohan ni Governor Edwin I.Jubahib nga ipasuspende una ang operations sa Premiumed Market gumikan nga usa na kining “Hotspot for Local Transmission”.

Apan, gihangyo sa mga miyembro sa Panabo IATF, labi na ni City Mayor Jose E.Relampagos ug Economic Enteprise Manager, nga dili lang padugayon ang temporaryong pagsirado tungod sa mga panginahanglang pinansyal sa mga tao. Gihangyo lang ni Mayor Relampagos nga samtang anaa sa striktong GCQ ang probinsiya, magbaton gihapon ang publiko og pagsunod sa mga Health Guidelines aron dili motaas ang kaso nga maoy hinungdan nga daghan pa ang masirado.

Imbes nga napulo (10) ka adlaw ang pagsuspende, gisabotan nga unom (6) nalang ka adlaw gikan Disyembre 13,2020 hantod Disyembre 18,2020 ang pagsara samtang atimanon sa City Health Office ug mga barangay health workers ang pagmonitor sa mga PUM ug sa mga nagpositibo.
Ilalom sa GCQ, ang tanang lakaw limitado lang sa mga essential nga mga butang sama sa pagtrabaho ug pagpalit og pagkaon ug medisina. “Ang pag-undang sa COVID-19 sa Panabo dili lang trabaho sa City Health, but trabaho ni natong tanan. Maningkamot ta nga dili ni mo abot og 2021 ug malipayon na tang mobalik sa normal,” ingon ni Assistant City Health Officer Dr. Eranie L.Pangilinan.

| cio