Nagsugod na ang Run After Contribution Evaders (RACE) sa Social Security System (SSS) Panabo Branch alang sa paggukod sa ilahang mga miyembro nga ginatawag nga “contribution evaders” sa siyudad sa Panabo. Sa ilang datos, ubay-ubay kuno ang mga employers sa siyudad sa Panabo ang aduna pay mga bayronon sa SSS ug unom (6) niini gi-adtoan mismo sa unang adlaw sa RACE Program kauban ang mga opisyales sa SSS ug media.

Ang pag-implementa sa programa kay subay sa Republic Act No. 11199 o ang Social Security Act of 2018, nga maniguro sa social security coverage sa mga miyembro sa SSS.

Ilalom sa RA No. 11199, adunay tulobagon ang mga employers nga P 5,000.00 – P 20,000.00 ug pagkapriso sa unom (6) hantod 12 ka tuig kung sila napakyas o nagdumili sa pagparehistro sa ilang mga empleyado sa SSS ug/o pagtangtang ug pagpakyas sa pagremit sa ilang mga kontribusyon, ug kontribusyon sa employer mismo.

Ang RACE usa usab ka information drive ngadto sa mga giila nga employers kabahin sa mga pamaagi nga maresolba ang ilang mga batal sa SSS, labi na nga katong mga na apektohan sa pandemiya. Matod pa, gihatagan sila og lugway sulod sa kinse (15) ka mga adlaw nga maresolba ilang batal ug adunay himoon nga kasabotan tali sa mga employer ug sa SSS.

Matod pa ni Vice President ug Acting Head sa South Mindanao nga si Mary Ellen A. Estoque nga dili angay mabalaka ang mga employers nga naglisod og bayad sa ilang kontribusyon. “Dili magoul kay ang SSS mutabang kaninyo sa pagresolba niini,” dugang niya.

Aduna sila’y gihatag nga “condonation program” nga makatabang sa mga miyembro nga ma-settle ang ilang loan balances nga walay silot ug mabawi ang ilang record sa SSS.

Nag-awhag ang SSS sa mga miyembro nga adunay wala mabayri nga short-term nga mga pautang sa pag-avail sa maong programa.

Sa kalihokan, anaa si SSS Manager – Panabo Branch Hilderbrando S. Ortega, SSS South Mindanao I Legal Atty. Renato D. Magno, ug VP Estoque.

Gi-awhag sa SSS Panabo sa tanang miyembro niini nga modangop sa ilang opisina nga nahimutang kilid sa NCCC Supermarket, Barangay Sto. Nino, Panabo City aron sila matabangan.

Kauban sa RACE si Panabo City Information Officer Michael Angelo A. Resueno, PIO Davao del Norte Josephine Elesterio, DXDN- Program Director & News Anchor Ruel Dagsangan, SSS Panabo Staff nga sila Rhovelyn Gamao, Gerardo Balagtas, Rachel Dandoy, Imee Genosas, Evelyn Ginoo, Reyneth Jane Roble, Richlene Salcedo, ug anaa usab ang presensya sa PNP Panabo ug TMU.

Katungod sa mga empleyado nga mangita sa ilang kontribusyon isip resulta sa ilang kahago sa pagpanarbaho. Tungod niini, gipaningkamotan sa SSS Panabo nga matabangan ang matag miyembro.

|IDOB