Agosto 4, 2022 — Gipahigayon ang Swine Recovery & Repopulation Hog Sentineling Program alang sa 74 ka mga naapektohan nga hog raisers sa unom (6) ka barangay nga mao ang Cagangohan, Sta. Cruz, JP Laurel, New Malitbog, Quezon, ug San Vicente nga gipahitabo sa Panabo Gym.

Ang mga beneficiaryo sa maong unom (6) ka barangay makadawat og feeds alang sa binuhing baboy ug ang baboy nga alimahan mismo. Ang mga benepisyaryo niini miagi sa Minimum Farm Bio Security Standards kung asa sila miagi og evaluation nga mamahimo naba sila mo buhi og baboy.

Sukad sa pagkuyanap niini adtong tuig 2020, gipaningkamotan sa CMO-City Veterinary Section sa pagpangulo ni City Veterinarian Dr. John Ray Bautista luyo sa suporta ni Mayor Jose E. Relampagos kauban ang Department of Agriculture (DA) ang paghatag og interbensyon alang sa mga naapektohan ug ang pagpugong niini aron malikayan ang kaso sa uban pang barangay.

Ang maong programa usa ka pamaagi nga masuta sa Department of Agriculture (DA) ug City Veterinary Section nga anaa pa ba ang hulga sa ASF sa siyudad. Adunay 40 ka adlaw ang mga hog raisers nga alimahan ang mga baboy og human niini sutaon sa City Veterinary pinaagi sa ilang Technical Monitoring and Evaluation kauban ang DA ug kini ang basihan nga madeklara nasab ang siyudad nga ASF Free City. “Kita sa LGU Panabo ang mo monitor human mahatag ang mga buhiong baboy kanila, kini siya usa gyud ka trial aron makita nato nga wala naba gayud ASF sa siyudad,” matod pa ni Dr. Bautista.

Nagpaabot usab si Mayor Relampagos sa iyang suporta sa programa, pinaagi ni City Administrator Pedrito A. Misoles ug iyang gisaysay ang pagpaningkamot sa LGU Panabo human sa pagkuyanap sa kaso. “Salamat kay Dr. Bautista kay gi work-on gyud ni niya, Thank you sad sa DA kay sila mi hatag sa inputs ( baboy ug feeds) anaa rami LGU Panabo kauban atoang City Veterinary nga mo monitor ani nga programa,” dungag pa ni Misoles.

Sa pikas bahin, mapasalamaton si Adelina Laspuna nga taga Barangay Cagangohan nga makanunayon ang paghatag kanila og update og dugang ayuda alang sa ilaha nga naapekotahan niini.

Human sa paghatag sa feeds lauman nga mahatag na kanila ang buhing baboy sa bulan sa Setyembre.

| Gen Alforque – CIO, Research Unit
📸| Quinn Villahermosa – CIO, Multimedia