Disyembre 7, 2021 – Wala nagpaulahi ang Panabo City sa National Pilot Testing sa face-to-face Trabaho, Negosyo, Kabuhayan (TNK) Fair atol sa selebrasyon sa 88th Founding Anniversary sa DOLE nga gipahitabo sa Barangay Gredu, Covered Court, Panabo City.

Ang TNK adunay tulo (3) ka mga aktibidad nga gihanyag sa mga nitambong. Kini ang face-to-face Job Fair, Livelihood Training on Perfume Making, ug Entrepreneurial Development Seminar.

Mihatag og mensahe si City Administrator Pedrito A. Misoles MAEd isip representante ni City Mayor Jose E. Relampagos. Nagpasalamat siya sa Public Employment Service Office (PESO) sa ilahang pagpaningkamot sa pag facilitate sa maong national activity sa DOLE. Dugang niini, gibutyag usab niya nga pirmente nga nagasuporta si City Mayor Relampagos sa mga aktibidad sa PESO kay aron matabangan ang katawhan sa Panabo nga makunhod ang poverty rate. Ani pa niya, “Madasigon ako ug si Mayor Relampagos nga daghan mopartisipar sa TNK Fair aron daghan pa ang mahatagan og trabaho ug panginabuhian.”

Matod pa sa usa ka job applicant nga si Aiza M. Alcomendras, nagpasalamat siya nga gi-awhag sila nga mo-apply hilabi na ang katong mga nawad-an og trabaho mahitungod sa pandemya kay gihatagan sila og kahigayonan nga magkatrabaho usab.

Sumala usab sa usa ka partisipante sa Livelihood Training ug Entrepreneurial Development Seminar nga si Kristine Claire Revilla, 19 anyos, interesado siya nga niapil sa maong kalihokan kay gusto siya makatuon og bag-ong pamaagi nga makakwarta siya. Dugang pa niya, “Puwede ko ni magamit ang knowledge nga akong nakut-onan karon kay akong pamilya nagasugod nasad og negosyo.”

Gilaoman nga daghan ang ma-hire on the spot sa mga nag-apply og trabaho sa Job Fair ug daghan ang makat-unan sa mga partisipante sa gipahigayon nga seminar ug training.
Anaa sa maong kalihokan sila PESO Manager Cherelle B. Espinosa, Atty. Randolf C. Pensoy, Regional Director – DOLE XI, Sr. Business Counselor-DTI Davnor Michael Bumaya, ug CTEC Alternate Lysander V. Gran. Anaa usab ang mga kompanya nga ALFALINK, LGU Panabo, PARAMOUNT, 3ME, ROSABAYA, NIMBL Simplybooks Inc., ECON Global Builders Corp. isip mga participating employers.

| Tim Acebedo, CIO-PIRO
📸 | A. Castilla & F. Paculanang, CIO-MULTIMEDIA