Hulyo 09, 2021 — Giklaro ni Licensing Officer Juliet S.Nacario nga prayoridad sa Motorized Tricycle Operators Permit (MTOP) Awarding ang mga taga Panabo nga tricycle drivers. Iya kining gibutyag sa RaJOE Serbisyo Program 94.3 human sa mga isyu nga gibato sa Lokal nga Panggamhanan kabahin sa pag-award og MTOP sa mga tricycle drivers nga taga laing LGU.

Gi anunsyo ni Nacario nga magsugod na pud sila sa pagdawat og MTOP registrants sa Hulyo 14,2021 hangtod Hulyo 27, 2021, 8:00AM – 5:00PM. Aduna lamang 40 ka aplikante kada adlaw ang dawaton sa BPLS diin lima (5) lamang ka aplikante kada oras ang maatiman sa opisina agi og pagsubay sa Modified Enhance Community Quarantine (MECQ) guidelines sa probinsya sa Davao del Norte.

Magpagawas pud og registration link pinaagi sa Facebook Page sa City Government of Panabo karong Hulyo 12,2021 para sa schedule of appointment. Ginadili usab ang personal nga pag-adto sa City Hall kung walay appointment.

Sumala pa ni Nacario nga dili kwalipikado ang mga naay kasamtangang gi-impound nga tricycle. “For those who have existing MTOP nga isa ka book, dapat dili sila delinquent. Pasabot, updated sila up to this year sa pagkuha sa ilang permit,” dungag pa niya.

Sa adlaw sa registration, mamahimong dalahon ang appointment stab, ang original copy sa ORCR sa sakayan, duha ka valid ID’s, QR code, ug ang pagsuot og face mask ug face shield.

Alang sa kumpletong impormasyon, mamahimong motan-aw sa interview sa https://www.facebook.com/panabocityofficial/videos/302319734977046

| Sonny L. Calizar, CIO – PIRO