October 5,2021 — Taas ang panlantaw sa lokal nga panggamhanan nga matabangan ang tanang mag-uuma sa siyudad sa Panabo diin gipahigayon ang pinakaunang “Banana Research and Tekno Forum” nga gipangunahan sa City Agriculture’s Office ug sa ilang pakig-alayon sa University of Southeastern Philippines – Tagum City nga gipahitabo sa Panabo Multi-Purpose Gym.

Ang mga topiko niini kabahin sa mga research update sa mga saging ug banana industry apil na ang bag-ong mga naimbento alang sa mga mag-uuma na mga tools ug ekipo na makatabang ilabina sa mga kababaehan na mag-uuma.

Matod pa ni Agricultural Research Section Head Teresa B. Balmores nga, “First time kining nahitabo, kabalo mi nga dako kaayo kining tabang ug giya sa atong mag-uuma sa siyudad sa Panabo.”

Gibutyag ni guest speaker Roger C. Montepio, Dean sa College of Agriculture & Related Sciences sa USEP-Tagum ang mga ekipo na ilang gipaambit sa mag-uumang Panaboans sama sa: Mechanical Banana Bagger, Banana Bell Injector, ug Soil Injector gamit alang sa sagingan. Dugang pa ni Montepio nga ang sagingan kinahanglan og investment. “Padayon gihapon kita despite sa mga maagian na kalisod sa sagingan kay kami andam mo tabang kanila sa paggiya kauban ang City Agriculture’s Office sa Panabo,” pahibalo ni Montepio sa mag-uuma.

Nagpahigayon usab ang City Agriculture’s Office og raffle draw diin nanghatag sila og mga seedling sa banana, Blacphil Planters, Yara Mila, og uban pang mga pang-abuno sa pananom.

Ang maong kalihokan subay sa 9th Binulig Festival 2021 nga adunay temang: “Pagpasalamat. Panaghiusa. Pagbarog Luyo sa Pandemya. Panaboans, Duyog Ta!”

Limitado lamang ang partisipante tungod sa pagsunod sa IATF protocols aron makalikay sa hulga sa COVID-19.

| Ivory Dawn Balogbog, CIO-PIRO
|📸 F. Paculanang