Atol sa gipahigayong Anniversary Culmination Program sa katapusang adlaw sa pagselebrar sa ika-23rd Araw ng Panabo, mipadayag si Vice President Sara Z. Duterte nga dako na ang kabag-ohan sa siyudad sa Panabo. Si VP Sara ang gi-imbita isip guest speaker sa maong aktibidad nga gipahitabo sa Panabo Gym adtong Marso 23, 2024.
“Dili ikalimod nga nakab-ot sa inyong siyudad ang top performer sa peace and order, illegal drugs campaign, local governance, and education. Dako na kaayo ug kabag-ohan inyong siyudad ug nalipay mi isip inyong mga silingan dinha sa siyudad sa Davao. Congratulations ninyong tanan,” dugang ni VP Sara.
Gimungkahi usab ni VP Sara nga magpasalamat ang katawhan kay City Mayor Jose E. Relampagos sa makakunayon nga pagduso sa mga polisiya sa infra, public safety, social services alang sa mga kabos, education, ug pagsiguro sa kadalanan sa Panabo, ug ang lapad nga drainage sa mga barangay.
Gipasalamatan usab ni VP Sara, ang tanang katawhan sa tanang sakripisyo ug sa pagtinabangay sa pagpalambo sa siyudad. Iya usab gibutyag, nga pag-abot sa panahon mahimong highly urbanized ang siyudad sa Panabo, nga usa sa damgo sa katawhan tungod sa padayon nga mga kalamboan nga nakab-ot sa siyudad.
Sa ulahing bahin, iyang gitanyag sa tanan nga andam ang iyang opisina sa unsa mang tabang sa katawhan kabahin sa medical, burial assistance, negosyo, ug panahon nga adunay crisis o kalamidad.
Sa maong kalihokan, anaa si Governor Hon. Edwin I. Jubahib, City Mayor sa IGACOS Hon. Al David Uy, First Lady Josephine G. Relampagos, Executive Secretary Josie Mary G. Relampagos, department heads, section heads, mga national line agencies, private companies, ug mga empleyado sa siyudad.
Atol usab sa pag-abot ni VP Duterte, anaa ang mga konsehales sa siyudad nga sila Hon. Janno Paolo Gentiles, Hon. Dizon Namuag, Hon. Omar Ranain, ug Ex-Officio councilors nga sila Hon. Conrad Theodore A. Matutino ug Hon. Julienne Angel Capuyan.
FULL COVERAGE: https://www.youtube.com/live/X_HdDMwqxRY?si=dI8Gpljh7nfAua94
#ServiceToPanaboansServiceToGod
Categorized in Featured