Nagpabiling operational ang 24/7 Safebirthing Facility sa Panabo City Health Office sa panahon sa pandemiya. Sumala pa ni Safebirthing Facility Doctor in-charge nga si Dr. Monica Dianne Jualo, padayon ilang pagdawat og mabdos nga inahan matag martes alang sa libreng pagpakonsulta.

Apan ginakonsidera lang nila ang low-risk pregnancy ug normal delivery sa ikaduhang pag buntis sa inahan, dili nila pwede dawaton ang gikan sa caesaraean section, mga buntis nga mga kabataan o “pregnant teenagers”, ug adunay mga mga laing sakit o comorbidities gumikan nga usa lamang sila ka “Lying-in Facility” base sa klasipikasyon sa Department of Health. Kung adunay komplikasyon, ginahatagan nila ang pasyente og referral para ma timan sila sa mas haom nga hospital.

Libre gihapon ang pagresita og tambal oras available kini sa pharmacy sa City Healh Office. Ilaha pud ginadawat ang Philhealth Card aron maminosan ang bayronon sa pasyente o mahulog nga wala na silay mabayran.

“Dako siya og tabang kay hilabi na karon nga pandemic,” matod pa ni Mary Anne Mabanog nga nagpacheck-up sa maong pasilidad. “Dako kaayo na privilege ang ilang services.”

Sa panahon usab sa pagpanganak, ang pasilidad mismo ang mopahigayon og swab test alang sa mga pasyenteng manganakay.

Abri usab ang pasilidad sa gusto magpakonsulta alang sa family planning method.

| Gen Alforque- CIO-PIRO