Mayo 31, 2021- Sukad natanyag ang Community Food Pantry sa Nanyo Elementary School, aduna nay 50 ka mga less fortunate nga residente ang nakabenepisyo niini. Namugna ang Community Food Pantry pinaagi sa pakig-alayon sa ekwelahan sa Nanyo Central Alumni Association, private sectors, ug sa Lokal nga Panggamhanan sa Panabo.

Ang maong kalihokan subay sa programa sa Project WATCH (We Advocate on Time Consciousness and Honesty) Community Outreach Program. “Aside sa nakatabang ta sa mga tao, na-inculcate usab ang tumong sa project WATCH nga ‘honesty’,” ingon pa ni Principal II Johanna P. Linterna.

Si Myrna Abergas, 47 anyos, nagmalipayon sa iyang nasinati isip usa sa nakapahimulos sa maong programa. “Daghang salamat sa nagpangulo ug nagsuporta niini. Dako kaayo ni og tabang sa amoa.”

Sa Community Food Pantry, adunay ubay-ubay nga mapilian sama sa de lata, bottled water, asukal, tambal, noodles, itlog, kape, gatas, ug gulay. Naghatag usab og duha ka sakong bugas ang LGU Panabo diin nakadungag kini sa mga pilian.

Nagpasalamat si NCES Alumni President Melchor F.Lanugan, Jr. sa Lokal na paggamhanan sa Panabo ilabi na kay City Mayor Jose E. Relampagos mahitungod sa dakong pagsuporta niya sa maong alumni association. Sumala pa niya, “Hinaot unta na kaning activity, sinugdanan pa kini og magpadayon pa.”

Laoman nga adunay second batch sa community food pantry ang mahitabo karong June 7,2021.

l Margot Lagura, CIO GIP
📷 Rommel Cayas, CIO Multimedia