Hunyo 08,2021 — 93 ka nga blood donors sa siyudad sa Panabo ang nitambong aron magdonar og dugo sa gipahitabong Mobile Blood Donation sa Lokal nga Panggamhanan sa Panabo pinaagi sa Department of Health ug City Health Office kauban ang Davao Regional Medical Center (DRMC). Gipahigayon ang kalihokan aron adunay dugang pundo nga dugo ang DRMC diin pwede kining gamiton alang sa mga nanginahanglang katawhan sa Panabo City.

Saysay usab ni CHO Blood Program Coordinator, Mildred Suello nga mapasalamaton siya nga na establish ang Blood Collecting Unit sa Panabo diin dili na maglisod ang katawhan sa pagkuha og dugo nga ilang gipundo. Dugang ni Suello, “Tungod naa nay duha ka blood bank nga ginapundohan sa atong dugo, ang Davao Blood Center ug ang DRMC, maistorya na gyud nako na naa na ta’y enough na blood pool para sa consumption sa nanginahanglang panaboans.”

Sumala pa ni Anna Marie Relampagos, usa ka blood donor, nga magamit ni niya kung adunay emergency sa ilang pamilya. Ingon niya, “Naga-donate gyud ko og dugo bisan pa man once a year lang para just in case of emergency, naa koy magamit, akong pamilya o sa ubang nanginahanglan,” matod pa niya.

Gidiin ni Suello nga importante ang mga gipundong dugo aron mapadali na lang ang proseso sa pag-withdraw sa dugo sa blood bank. Awhag niya, “Maskin isa lang sa iyong pamilya ang magdonate og dugo kay dako kaayo nang tabang sa atoang blood pool sa blood bank.”

Ang kalihokan gipahitabo sa Panabo City Multi-Purpose Gym diin gisubay ang health protocol sama sa pagsuot og face mask ug face shield batok COVID-19.

| Sonny L. Calizar, CIO – PIRO
📸 | Margot Lagura