Nagpahigayon og random drug testing ang City Anti-Drug Abuse Council (CADAC) ngadto sa mga drug surrenderers adtong Hunyo 04,2021 sa Barangay New Pandan Hall aron masigurado kung aktibo pa ba sila sa droga. Apan, gawas sa 11 ka mga drug surrenderers sa maong barangay nga gipailalom sa drug testing, usa (1) kanila ang nagpositibo.

Ang nagpositibo gipahimangnoan nga mag enroll usab sa sunod nga batch sa Community-Based Rehabilitation and Aftercare Program (CBRAP) ug dili usab siya maapil sa mga benepisyo sa kasamtangan nga programa sama sa livelihood assistance.

Matod pa ni CADAC Head Secretariat, Roqueos L. Cimafranca nga aduna ray duha ka tyansa ang ihatag alang sa mga drug surrenderers og kung sila masakpan pa, dili na sila apilon sa maong programa.
Ang Community Based Rehabilitation and Aftercare Program o CBRAP usa ka programa sa Lokal nga Panggamhanan sa Panabo, kauban ang DAVNOR CBRP-IMS Katatagan Kontra Droga sa Komunidad KKDK nga adunay tumong nga mahatagan og tsansa ang mga surrenderees nga mohawa sa impluwensya sa droga.

Sa kasamtangan, anaay 212 ka mga drug surrenderers gikan sa mga barangay New Pandan, Cacao, Kauswagan, Malativas, ug Katipunan diin 134 kanila ang napailalom sa CBRAP.

Sumala pa ni CADAC Head Secretariat, Roqueos L. Cimafranca, nga “Hopefully, mo-graduate na ang 5th batch this 23rd of July aron maka proceed na pud ta sa ubang barangay.” Pahimangno pa niya nga dili moundang ang War on Drugs campaign bisan pa man naa pa ang pandemya sa COVID-19. “Still, atong PDEA ug PNP sa Panabo nagamonitor ug continuous ang apprehension sa mga nainvolved sa illegal drugs.”

Sa upat (4) ka bulan, nagkalain-lain ang mga aktibidades ang nahimo sa CBRAP sama sa drug symposiums, biblical lessons, livelihood programs, ug sports activity.

Giuna ang Barangay New Pandan drug surrenderers og drug testing pinaagi sa random nga pagpili sa mga lima ka barangay.

| Sonny L. Calizar, CIO – PIRO