Oktubre 4, 2021 – Opisyal nang gi-ablihan pinaagi sa birtwal nga pagsaulog ang 9th Binulig Festival nga adunay temang: “Pagpasalamat. Panaghiusa. Pagbarog luyo sa Pandemya. Panaboans, Duyog ta!” nga gipahitabo sa Panabo City Gym.

Sa unang bahin sa pag-abli sa 9th Binulig Festival, nagpahigayon og Misa Pasalamat nga gihatod ni Father Benjie Lucena, Chaplain San Antoño de Padua Chaplaincy.

Sa ikaduhang bahin, ang Pag-abli sa Binulig Ceremony. Gisugdan kini sa pag-ampo nila IP Representative Datu Iboyen Bohol, Muslim Representative Imam Rey Macla, Christian Community Representative Pastor Gil Gipolan, ug Chaplain San Antoño de Padua Chaplaincy Father Benjie Lucena.

Sa Pag-abli sa Binulig, ninghatag og mensahe ang amahan sa lungsod nga si City Mayor Jose E. Relampagos. Matod nya nga malipayon siya kay nahatagan og higayon ang panaboans nga makaselebrar sa mga gasa nga nadawat ug ang abundang ani bisan paman anaa sa pandemya. Dugang pa niya, “Ang syudad sa Panabo abunda ug malamboon ug gapadayon sa pag-ugmad. Makighiusa kita kanunay sa pagbarog luyo sa tanang pagsulay ug hagit sa panahon.”

Ninghatag usab og mensahe ang Governor sa Davao del Norte nga Hon. Edwin I. Jubahib. Ani pa niya, “Ang inyong kooperasyon ug suporta maoy kusog sa panaghiusa aron kita siguradong makabarog ug makahaw-as sa pandemya, unta samtang nagsaulog kita niining selebrasyon sa 9th Binulig Festival, makabaton kita’g paglaom ug kalipay nga aduna pay mas labing hayag nga ugma nga alang ka natong tanan.”

Anaa sa seremonyas sila City Administrator Pedrito A. Misoles MaEd, Executive Assistant III to the City Mayor Jo-anne Relampagos-Capuyan, City Councilor/Chairperson, Committee on Tourism Trade & Industry Investment and Socio-Cultural Hon. Dizon P. Namuag, MBA ug ang guest speaker nga si Regional Director-Department of Tourism XI, Tanya Virginia Rabat-Tan.

| Tim Acebedo, CIO-PIRO
📸 Rommel Cayas